طبيب أسنان يعالج كبار السن والأطفال بالمجان: «حاسس بالناس»

09:02 م | الجمعة 22 يونيو 2018

شعوره الدائم بآلام المرضى وأوجاعهم، معرفته بحجم المعاناة التى يشعرون بها، خاصة غير القادرين مادياً فى ظل الارتفاع المستمر للأسعار، جعل طبيب الأسنان معتز أشرف يبذل قصارى جهده لمساعدة غير القادرين من كبار السن والأطفال، من خلال استقبالهم داخل العيادة بمنطقة شبرا الخيمة، وإجراء الكشف الطبى لهم، وتحديد العلاج المناسب والجلسات المطلوبة للشفاء بالمجان، وأحياناً يقوم بعلاج آخرين بأسعار مخفضة.

يفتح «معتز» عيادته بالمجان لمن لا يملك المال، وأحياناً بأسعار مخفضة، منذ ما يقرب من 5 أعوام: «أى كشف دكتور دلوقتى بقى غالى جداً وفيه ناس ما تقدرش فبتهمل فى أسنانها، فتتعدى باقى الأسنان، والمشكلة بتكبر وما بيكونش معاهم فلوس يتعالجوا».

يعتبر أن مهنة الطب قائمة على الأخلاق والمبادئ الحسنة، لذلك لا يهتم بالمكاسب المادية التى يجنيها، وإنما بعلاج أكبر عدد من المرضى الذين يصارعون الألم، نظراً لعدم قدرتهم على العلاج: «فى العيادة بنستقبلهم، لو حالته المادية بسيطة خالص يبقى بالمجان، وفيه ناس بتدفع اللى تقدر عليه وأنا بتحمل الباقى».

على الرغم من صغر سنه، الذى لا يتعدى الـ27 عاماً، فإن «معتز» يساعد بعض طلبة الطب أيضاً، عن طريق استقبالهم وتوفير ميزة التدريب وممارسة المهنة بشكل عملى: «تعليم الجامعة بيفرق عن الشغل، وباتيح الفرصة دى لطلبة آخر سنة فى الكلية، وباتبنى حالتين أو تلاتة فى السنة لو حابّين يكملوا بيشتغلوا معايا».

لا يبخل «معتز» بالوقت عليهم، ليتعلموا من خلاله احتراف المهنة: «أول ما بدأت فى شغلى لاقيت اللى يمد لى إيده ويعلمنى، وده خلّانى شايل الجميل وبحاول أرده فى المرضى وفى الطلبة اللى لسه بتتعلم، وكمان اتعلمت من الكبار إن الطب أخلاق».