كافيه متنقل لمشروبات الشتاء: بردان تعالى اشرب
كافيه متنقل لمشروبات الشتاء: بردان تعالى اشرب
تمرد على صفوف العاطلين بمشروع بسيط، عبارة عن عربة «زستافا» قديمة، وماكينة صنع مشروبات ساخنة، وراديو ضبط تردده على محطة الأغانى يستمتع المارة بمنطقة دوران شبرا بألحانه. بسام محمد، 22 عاماً، منذ بداية فصل الشتاء، قرر أن يستغل الموسم بتحويل سيارته الملاكى إلى كافيه متنقل بأسعار زهيدة، ما إن تقف أمام عربته حتى تستمتع برائحة القهوة البرازيلى، ومذاق الكابتشينو الذى يهوّن برودة الطقس: «الكافيهات بقت غالية جداً، أنا باعمل نفس المنيو اللى فى الكافيه من غير ما آخد ضرايب ولا تكاليف للقعدة فى المكان».
«أكل العيش يحب الخفية»، مقولة يردّدها «بسام» باستمرار، وتهون عليه المسافة التى يقطعها يومياً من منطقة إمبابة إلى منطقة شبرا لمزاولة عمله: «شبرا حى فيه فسح وأماكن للتمشية وشوارع قديمة، الناس هنا مش بتنام الـ24 ساعة، وده سبب إنى اخترت أفتح مشروعى فيه».
نسكافيه، كابتشينو، قهوة برازيلى، بوريو، آيس كوفى، لاتيه، موكا هى المشروبات التى يقدمها للمارة: «فى الصيف هاغير ده كله بمشروبات وعصائر تمشى مع الطقس، هاقدم حلويات وكمان آيس كريم رول»، تتراوح الأسعار على العربة بين 5 و15 جنيهاً: «الأسعار على قد الإيد.. والإقبال كويس جداً، الناس بتتبسط وتتدفا».
40 ألف جنيه هى تكلفة المشروع الذى قام «بسام» بافتتاحه: «جدّدت العربية بـ5 آلاف جنيه، هى عربية قديمة جداً، بس بتمشى عادى، وجبت الماكينة بـ35 ألف جنيه، هى غالية بس بتعمل كل المشروبات اللى باحتاجها»، استطاع الشاب العشرينى خلال 60 يوماً أن يغير هيئة العربية التى أنشأ مشروعه عليها: «دهنتها بنفسى، وحاولت إنى أزينها بالاستيكر والنور، شيلت الكراسى والكنبة الخلفية وحطيت مكانهم ماكينه عمل المشروبات.. واخترت اللون الأصفر للدهان، لأنه بيكون زاهى وملفت جداً بالليل».
