بريد الوطن| احتفظ بسترتك القديمة لأجل ذكرياتك الجميلة

08:45 م | الأربعاء 26 ديسمبر 2018

إيه العلاقة بينك وبين هدومك القديمة؟ بترميها ولاّ بتحتفظ بيها؟ ولاّ بتديها لجمعية خيرية أو حد محتاج ينتفع بيها؟ بتشوفها كراكيب فى دولابك لازم تخلص منها ولاّ بتفكرك بذكريات حلوة وهى معاك؟ عشان كده بتصمم إنك تحتفظ بيها، أكيد الاختيارات صعبة بس فيه موضة وكل سنة حاجات تانية بتجذبنى وتشدنى وبتدفعنى إنى أشتريها حتى ولو مش محتاجها، تفتكر ممكن نطبق القانون اللّى بيحكم علاقتنا بالهدوم على علاقتنا بالبشر ولا هتقول ما ينفعش طبعاً ودى حاجة تانية تماماً؟ إزاى علاقتى بالجماد تبقى زى علاقتى بأجمل حاجة ربنا خلقها، تعرف إن فيه ناس بتطبق نفس القانون بكل نصوصه، حاجة غريبة فعلاً بس الأغرب إن عددهم فى زيادة بشكل سريع جداً، مش مقتنع بكلامى، طب تعالى معايا، واحد بيحب زوجته جداً أول ما تحصل بينهم خلافات بينسى كل لحظة حلوة كانت معاها وهى كمان ويدخلوا فى نزاعات وقضايا، كام مكالمة بتعملها طول اليوم؟ تقدر تقول فيه مكالمة واحدة لشخص كان فيه بينكم ذكرى حلوة أو صديق قديم فرقت بينكم الأيام أو جار كانت بينكم عشرة وعزِّل من منطقتك، ولاد بلدك قبل ما تسيبهم وتستقر فى المدينة، حماك وحماتك علاقتك بيهم إيه؟ بتزورهم ولاّ بتقول أنا خلاص أخدت اللى يخصنى؟ باختصار ما تخليش علاقتك بالناس قايمة على المصلحة وبمجرد ما تنتهى كأننا ما نعرفش بعض. صديقى العزيز.. ما أجمل رائحة الماضى، لن تجدها مهما بحثت عنها، فاحتفظ بها وتذكر دائماً مكانها.

محمد فهمى سويلم

محام - المنوفية

يتشرف باب "نبض الشارع" باستقبال مشاركاتكم المتميزة للنشر، دون أي محاذير رقابية أو سياسية، آملين أن يجد فيه كل صاحب رأي أو موهبة متنفساً له تحمل صوته للملايين.. "الوطن" تتلقى مقالاتكم ومشاركاتكم على عنوان البريد التالي

bareed.elwatan@elwatannews.com