جد ومداعبة.. مرونة السيسي تُحاسب الجميع: "يا دكتور مصطفى منزودش الوزن"

06:04 م | السبت 15 ديسمبر 2018

تيسير الحياة على المصريين ورفع شأنهم كل ما يتمنى، والتدقيق في كل كبيرة وصغيرة من أمور حياتهم وكيف تتصرف الحكومة في شؤونهم دينه ونبراسه، هذا الذي ظهر جليا في مقاطعات الرئيس عبدالفتاح السيسي للوزراء والمسؤولين، اليوم، في افتتاح عدد من المشروعات التنموية في مقدمتها محطة معالجة الصرف الصحي بالجبل الأصفر، ومشروع "المحروسة 1".

"السيسي ووزيرة الصحة"

استوقف الرئيس عبدالفتاح السيسي، الدكتورة هالة زايد وزيرة الصحة، أثناء عرضها لملخص ما توصلت له الدولة في مبادرة الرئيس "100 مليون صحة"، خلال حفل افتتاح عدد من المشروعات القومية.

وقال السيسي لوزيرة الصحة: "نحاول نشرح بشكل أكثر تبسيطا علشان نوصل الرسالة، وعاوز أقف قدام اللوحة دي، وهقول أرقام متتنسيش.. اللي تم المسح عليهم 17 مليون تقريبًا حتى الآن، في المرحلة الأولى وجزء من المرحلة الثانية، فيه 700 ألف مصاب بفيروس سي، ولكن الأمراض غير السارية 11 مليون، بإجمالي 11.7 مليون إنسان مصري عندهم مشكلات مختلفة من إنسان لآخر وقد تجتمع الأمراض في إنسان واحد".

وتابع السيسي: "إحنا بنعمل في نفسنا كدا ليه، بنتكلم على 17 مليون إنسان، منهم 11 مليون منهم بعافية بشكل أو آخر".

وانتقد الرئيس السيسي الأوزان الزائدة للمصريين، "مش بكلمكم علشان التكلفة المالية.. كل حاجة ممكن تدبر بس الصحة متدبرش، في الإعلام لازم نختار ضيوف البرامج، وشكلهم، كل واحد يفتش كويس أوي، أنا وأنا داخل أي مكان ببص على حاجات متخطرش على بالكم، وأقول إيه الناس دي، الناس مش واخدة بالها من نفسها ليه.. إزاي بتقدروا تمشوا كده وإزاي بتقدروا تطلعوا السلم كده.. بتكلم على الشباب مش الناس الكبيرة في السن".

وتابع السيسي: "أنا قولت اللوحة دي تتحط قدامكم علشان ده مؤشر جامد أوي، إننا نقول اللي وزنه طبيعي أقل من 25%.. طب والباقي، يا فوق الوزن، يا سمنة أو سمنة مفرطة.. ده كلام بيتحول لأمراض تأذي الناس.. عبء على أجهزة الجسم".

وأوضح: "بيتهيألي إنكم محتاجين الإعلام وأجهزة الدولة، بنبدأ عمل برنامج ضخم جدا للتوعية الصحية والتوعية بخطورة زيادة الوزن، ده موضوع مهم أوي مش علشان التكلفة.. أنا عاوزك تعيش بصحة وعافية وسلامة لأكبر فترة ممكنة".

وأضاف: "كل ما يكون الوزن قليل، والحركة كتير كل ما الصحة تبقى أفضل والعكس صحيح، كل ما نركب توكتوك علشان 100 متر وكده.. مش ممكن، كل ما نتحرك قليل كل ما نتخن ونزيد ومش عارفين ننام كويس، ومش قادرين تاخدوا نفسكم".

وطالب السيسي المجتمع ومؤسسات الدولة بالتدخل لحل المشكلة، قائلا: "الجمعيات الأهلية ومؤسسات الدولة خدوا بالكم ببرنامج نصر عليه.. حد يقولي أنا هخلي التعليم الرياضة فيه مادة أساسية للنجاح، المرحلة محتاجة كده.. ولا هو مجموع كويس وخلاص بس محدش بيعلم ولاده الرياضة".

وتابع: "بقى أنا ابني أو بنتي لما يتخرج من الجامعة، يبقى ضهره قابل للانزلاق الغضروفي نتيجة وزنه.. كده أنا مسلمتش ابني للحياة مظبوط.. إنتم محتاجين برنامج يمكن يكون من ضمنه جزء من الشهادة، علشان الأباء ينزلوا ياخدوا ولادهم يلعبوا رياضة بيهم، مدام حجم الوزن الزيادة في بلدنا وصل للشكل ده".

واستطرد، "عارفين سمنة وسمنة مفرطة يعني قد إيه؟.. دي أرقام كبيرة جدا قد يصل بنا الأمر لإننا في الجامعات والمدارس إننا يبقى فيه مباريات ومسابقات بشكل مستمر ونمشي ونتحرك ونعمل ماراثون بشكل كتير ونخلي مراكز الشباب تدعو لهذا الأمر".

ومازح السيسي الدكتور مصطفى مدبولي رئيس الوزراء، "إحنا في مجلس الوزراء.. يا دكتور منزدش".

واستوقف الرئيس عبدالفتاح السيسي، الدكتورة هالة زايد وزيرة الصحة، أثناء عرضها لملخص ما توصلت له الدولة في مبادرة الرئيس "100 مليون صحة"، مرة أخرى.

وقال السيسي: "الدكتورة هالة زايد مكانش ليها تطلع تتكلم النهارده.. بس أنا قولتلها لو سمحتي اطلعي حللي الموضوع وكلمي الناس، وطلعت قالت الموضوع بالأرقام، لكن الأرقام بتتحول لحكاية، حكايتنا.. بنتكلم عن 17 مليون مواطن من 55 مليون، منهم 11 مليون مصابين في المسح الطبي، وهي أرقام كبيرة هتدينا مؤشر"، مضيفا "كل ما هنقدر نميكن البيانات كل ما هنقدر نصل لبيانات نشوف بيها إحنا فين".

"السيسي ورئيس الهيئة الهندسية للقوات المسلحة ومدير إدارة المياه بالقوات المسلحة"

وقاطع الرئيس عبدالفتاح السيسي، اللواء عاصم عبدالله شكر مدير إدارة المياه في القوات المسلحة، وتحدث عن محطتي مياه بحر البقر والمحسمة.

وقال الرئيس السيسي: "بقول للمصريين إن واحدة منهم كانت بتخش على بحيرة المنزلة تتلف البحيرة، وتتلف الحياة المائية، وواحدة تنزل على بحيرة التمساح وتغير البيئة المائية لها.. دي مش بتاعتك، بس أنا بقول للمصريين إننا لما نيجي نعمل مشروعات بتكون متكاملة مع بعضها مش على قد المعالجة أو تحلية المياه، لكن أيضا المحافظة على البيئة وشرط صحية حقيقة لبحيرة مثل بحيرة المنزلة".

وأضاف السيسي: "لما باجي أراجع المواضيع مع الناس اللي بتشتغل، بلاقي المسؤولين مش واخدين بالهم من اللي إحنا بنعمله.. يا كامل تلوث بحيرة كاملة على 250 ألف فدان وإحنا بنعمل محطة معالجة المياه، لازم المسؤولين يعرفوا إن المشروع ده قومي.. وهنعمل المزارع السمكية على أرقى ما يكون تكلفتها غير اقتصادية.. لكن الشغل البلدي اللي بيتعمل بيتلف مستقبل أولادنا".

وسأل الرئيس السيسي اللواء كامل الوزير رئيس الهيئة الهندسية للقوات المسلحة، "المحطة دي هتتكلف 18 مليار؟"، ورد الوزير: "لأ 20 يا فندم"، ورد السيسي عليه: "لأ 18 ولا إيه يا عاصم؟"، وحاول اللواءان عاصم وكامل شرح أن هناك مليارين إضافيتين لتحويلات المسارات، لكن السيسي قاطعه: "ماليش دعوة.. أنا ليا المحطة"، "الـ18 مليار دول.. علشان نستفيد من الميه ومنخليهاش تلوث المنزلة".

وقاطع الرئيس عبد الفتاح السيسي، اللواء عاصم عبدالله شكر، مدير إدارة المياه في القوات المسلحة، مرة أخرى قائلا: "والله والله اللي بيتعمل في مصر ده غير مسبوق، وفي كرم كبير من ربنا سبحانه وتعالى".

وأضاف السيسي، خلال حديثه في حفل افتتاح عدد من المشروعات القومية، "الرسالة اللي بتكلم فيها يا عاصم مش علشانك أنت ومش علشانك يا كامل، بس علشان المحافظين اللي حوالين بحيرة المنزلة يساعدوا معانا، وقائد الجيش في نطاق المنطقة مسؤول معاهم".

وسأل السيسي اللواء كامل الوزير، رئيس الهيئة الهندسية للقوات المسلحة، عن ميعاد الانتهاء من تطوير بحيرة المنزلة، ورد الوزير: "30/6/2019 هنكون مخلصين تطوير البحيرة وتكريكها".

وقال السيسي: "لو النهارده وزارة الزراعة بتجهز إصباعيات محترمة، في فيلم كان نفسي أفرجهولكم.. بيصطادوا زريعة البحيرة، ويعبوها في عربيات النقل علشان يعملوها سماد.. حد يعمل في نفسه كده؟ ياخدوا الزريعة اللي لو قعدت هتوصل كيلو.. تتلم وتتحمل يحطوها في الأحواض".

وتابع السيسي: "أجهزة الدولة مش هتقدر تظبط حركة 100 مليون، محدش هيقدر.. قولت لكامل وقف حد للكلام ده علشان البحيرة دي ترجع تنتج سمك.. ساعدوني بقى"، وتساءل الرئيس: "دكتورة منى محرز موجودة؟.. يا دكتورة أنا بقول إنكم بتساعدوني".

وقاطع الرئيس عبدالفتاح السيسي، اللواء عاصم عبدالله شكر مدير إدارة المياه في القوات المسلحة، أثناء حديثه، للمرة الثالثة قائلا: "بحيرة التمساح هي فاصل طبيعي بين مياه البحر الأحمر والمتوسط، وإحنا بنشتغل فيها ولما نيجي نفتتح الأنفاق هنطهر البحيرة تماما".

وأضاف الرئيس: "الكورنيش اللي كان مليان عشوائيات شيلناها، وعملنا سوق سمك وممشى سياحي.. طب محافظ الإسماعيلية يساعدني فيه ولا ميساعدنيش؟.. أنا عارف حمدي راجل محترم".

وقال اللواء كامل الوزير، رئيس الهيئة الهندسية للقوات المسلحة، "حضرتك وجهت يا فندم بالنسبة لبحيرة المنزلة كل الصيادين اللي كانوا عاملين مزارع سمكية جنوب الطريق الدولي الساحلي علشان محدش يضار.. وجهت نعمهلم 4000 فدان مزارع سمكية، شمال الطريق الدولي الساحلي، ووجهت إن كل الناس اللي كانت زارعة أراضي وحولت النشاط من استزراع سمكي لزراعة، وجهت لكل من هو عاوز مساحة أرضه وأكتر شرق قناة السويس على 250 ألف فدان اللي هيعدوا بحر البقر ياخد بديل بدل أراضيه".

قاطع الرئيس عبدالفتاح السيسي، اللواء عاصم عبدالله شكر مدير إدارة المياه في القوات المسلحة، خلال حديثه عن مشروعات المياه، مرة أخرى قائلا: "كنا اتكلمنا عن محطة الجلالة وقولتلكم خليكم مع رجال الصناعة في مصر".

وخاطب السيسي اللواء كامل الوزير، رئيس الهيئة الهندسية للقوات المسلحة، "يا كامل رجال الصناعة في مصر والقائمين على العمل، علشان نعظم المكون المحلي، ما دام إحنا داخلين في برنامج ضخم بالمستوى ده، وبما إننا بنعمل محطات بحجم كبير كدا، قولت خشوا مع رجال الصناعة، ومع الشركات اللي بتنفذ المشروع علشان نعظم المكون المحلي.. عملتم إيه يا كامل؟".

ورد الوزير: "الفلاتر تنشأ عندنا، والأغشية فقط يتم التنسيق مع الهيئة العربية للتصنيع من أجل عمل مصنع أغشية في مصر"، ورد السيسي: "أنا بقولكم كده علشان ده مجال هنتوسع فيه الـ10 سنين الجايين، ولا بد يكون عندنا حاجتنا ونشغل الناس، ده اللي قولناه يا عاصم؟".

ورد اللواء عاصم: "أنا جبت كوريين يا فندم وإن شاء الله مصنع LG جايلنا على آخر الشهر"، ورد السيسي مستنكرا: "يا نهار أبيض"، وتدخل اللواء كامل الوزير: "هنجيب أكتر من مصدر والهيئة العربية للتصنيع جاهزة".

وقال السيسي: "أنا بقول الكلام ده علشان كل رجال الصناعة في مصر يعرفوا إن فيه فرص كتير جدا لعمل وصناعة منتجات محتاجينها في الخطة اللي مصر شغالة فيها، لكن لما نيجي نتكلم في حاجات كتير جدا ممكن تكون بتتجاب ممكن الخارج، وقولتلك يا كامل هات رجال الصناعة وقول عاوزين ده وده وده بالكميات دي خلال الـ10 سنين الجايين، بحيث يكونوا عارفين إن استثمارتهم هتعود ليهم مرة تانية". ورد الوزير: "هنعمل مصنعين كبار واحد للأسانسرات، والتكييفات وغيرها".

"السيسي وقائد المنطقة المركزية العسكرية"

وقاطع الرئيس عبدالفتاح السيسي اللواء عماد الغزالي قائد المنطقة المركزية العسكرية، في أثناء استعراضه لتفاصيل مشروع الإسكان الاجتماعي بحي السلام أول "أهالينا"، والمفروشات الكاملة للوحدات السكنية.

وقال السيسي: "يا عماد إيه الغسالة دي؟.. إنت جبت كله كده؟"، ورد اللواء الغزالي: "غسالات عادية يا فندم". ومازح السيسي الدكتورة غادة والي وزيرة التضامن الاجتماعي: "دكتورة غادة مش عاوزة تصرف.. خلاص ماشي يا عماد".

وتساءل السيسي: "الكنيسة فين يا عماد؟"، ورد الغزالي: "معملناش كنيسة"، فاستنكر السيسي: "ليه؟.. ده توجيه.. الموضوع مايفوتناش تاني"، فرد الغزالي:"هنعمله في أهالينا 2 إن شاء الله"، فرد السيسي: "أنا عارف إنك مكنتش موجود في فترة التخطيط دي فلو سمحتم ده أمر.. لو سمحتم نعمل علشان كله يعبد زي ما هو عاوز".

وقال السيسي مخاطبا الفريق أول محمد زكي القائد العام للقوات المسلحة، وزير الدفاع: "يا محمد ده موضوع قولنا خلاص بقى".

"السيسي وكامل الوزير"

وسأل الرئيس السيسي، اللواء كامل الوزير رئيس الهيئة الهندسية للقوات المسلحة، "دلوقتي يا كامل ترعة الطوارئ دي هتخلص أمتى؟.. كان نفسي تجيبوا فيلم تبينوا للناس كنا فين فيها، والناس اللي بتبني بعيد عن التخطيط العمراني الحقيقي للدولة يبقى عامل إزاي، بكلمكم علشان لما نفتتح.. أخبار المحاور إيه؟".

ورد الوزير: "محور الطوارئ يا فندم 9 كيلو استلمنا منه 7 كيلو بتنسيق مع محافظة القاهرة، والقيادة المركزية، وجرى إزالة كل التعديات العشوائيات والعشش الموجودة، وباقي 2 كيلو فقط سيتم انتهاء منه هذا الشهر، والمحور نفسه بالكباري ينتهي مع نهاية 2019، ولكن أهالينا 2 ممكن نزيد 6 أشهر تانيين".

واعترض السيسي على الوزير: "لأ.. اشتغلوا وأبدؤوا دلوقتي"، وخاطب السيسي المصريين: "عارفين المحور بالكباري هيتكلف كام؟"، ورد الوزير: "2 مليار جنيه يا فندم"، واستكمل: "لو سمحتم اسمعوا، المحور ده.. الناس مش عارفة مكانه أصلا ولا هو فين.. ده المنظر بتاع مصر دلوقتي".

وأضاف: "كل المناطق العشوائية الخطرة منظرها زي المنظر ده ويزيد، اللي بيتعمل فيها قد نصل لـ250 أو 300 ألف وحدة سكنية، وأرجو إن المصريين ينتبهوا لكلامي، أنت بتدي للمواطن ده اللي كان قاعد في مكان متتخيلهوش ومترضاش بيه شقة من دي بعفشها، ده حد في العالم عمله غيرنا؟".

واستفسر من الدكتورة غادة والي لتؤكد حديثه: "ولا إيه يا دكتورة؟.. لأ صحيح؟، والله ما حد عمل كدا في العالم غيرنا، بنحول حياتهم بشكل يليق بيهم ولمستقبلهم، مش بتقولوا عاوزين نعالج الجهل والتطرف، هو مش كلام وعناوين".

ووجه السيسي الشكر للبنك الأهلي والبنك المركزي: "أشكر البنك الأهلي وكل اللي تقدم وساهم في المشروع.. اللي أنتم شايفينه المباني العبارة عن سنين طويلة دون تخطيط وترتيب الناس بقت عايشة بشكل صعب".

وتابع السيسيي: "ومش هنسى أشكر البنك المركزي اللي ساهم معانا بمليار جنيه في قوائم الانتظار مش هنسى مش كده يادكتورة؟"، وردت زايد: "ساهم بـ900 مليون يا فندم".

وأشاد السيسي بدعم البنوك ورجال الأعمال للمشروعات القومية: "بدعم البنوك ورجال الأعمال ووزارة التضامن، قدرنا نعمل كل ده"، مؤكدا: "الدكتورة غادة ماسكة فيا لأني عاوز أفرش كل الواحدات، والشقة متوسطها 30 ألف يعني 6 مليار، وهو مبلغ كبير جدا، والدكتورة بتقول كفايا نديهم الشقة، وده رأي سليم، بس أنا بآخد الطريق الصعب علشان الناس تبقى عايشة كلها زي بعض، ميبقاش في فرق".

وأوصى السيسي الدكتورة غادة والي: "في المناطق دي يا دكتورة غادة قولت قبل كده في لجنة مشكلة من الإسكان والتضامن والدخلية، والدفاع والمحافظات، التي تقع في نطاقها مجموعة مشروعات من الإسكان تبقى موجودة والجمعيات الأهلية الموجودة ووزارة العدل من أجل عمل عقد نموذجي به التزامات حاسمة للقاطنين في هذا الأمر حتى لا يغيروا في العقود، العقد به التزامات واضحة، وكتر يا عماد في التخطيط وزود المحلات، علشان المستثمرين الصغيرين، علشان نخلق فرص عمل داخل الكيان، ولما تجهزوه أعرضوه عليا ونيفين جامع رئيس جهاز المشروعات الصغيرة تساهم".

"السيسي ومحافظ القاهرة"

قاطع الرئيس عبدالفتاح السيسي، اللواء خالد عبدالعال محافظ القاهرة، أثناء حديثه عن العشوائيات في مصر، وقال السيسي: "اسمحلي أسألك عن عدد الوحدات والمراحل الجاري تنفيذها"، ولكن المحافظ لم يفهم ما يقصده السيسي، فاضطر الرئيس إلى الاستعانة باللواء كامل الوزير رئيس الهيئة الهندسية للقوات المسلحة.

وقال الوزير: "المرحلة الجاري تنفيذها يا فندم ستفتتح خلال شهر، وستكون شاملة المحروسة 2 والأسمرات 3، ستغطي 9 مناطق عشوائية، ولن يكون هناك مناطق مهددة للحياة".

وسأل السيسي محافظ القاهرة مرة أخرى: "من فضلك.. أنا مش عارف هتبقى جاهز ترد على الأسئلة دي ولا لأ؟.. صندوق العشوائيات عندك بيكون فيه كام فلوس؟"، وحاول رئيس الوزراء الدكتور مصطفى مدبولي التدخل والإجابة على السؤال، ولكن السيسي رفض: "هو بيتجمع عندك أنت؟.. لأ معلش، هو يعرف؟"، ولكن محافظ القاهرة لم يجاوب، فقال السيسي: "هسألك سؤال تاني، ومش هدفي أي حاجة والله"، "دخل المحافظة كام؟"، ولم يرد المحافظ أيضا.

وأكد الرئيس: "تصدق وتؤمن بالله أنا عارف دخل مصر كام بالحتة، ده شغل.. وإذا مكنتش تعرف كل جنيه في محافظتك.. إزاي تعظمه وإزاي تكتره علشان نحل مسائل زي دي؟".

واستكمل السيسي: "اتعملك كام كوبري في 4 سنوات اللي فاتوا؟"، ولم يجاوب المحافظ أيضا، "فقال له السيسي: "أنا مقصدش بكده حاجة، علشان هتقعد مع مواطنين وعاوز تتكلم معاهم فلما تيجي تتكلم معاهم أرجو ده ميحرجكش، لازم أبقى عارف راسي من رجلي في كل شيء، وتعمل سياق، آسف إن المثال جه فيك أنت.. أنا مقصدكش أنت أنا أقصد كل زمايلنا اللي بيتكلموا مع الناس".

وتابع: "خلوا أي حد ييجي يتكلم معايا عن مصر.. حافظها علشان أرد، علشان محدش يقولي كلام ويقنعني إنه الحقيقية، اللي بيتكلموه معايا مش حقيقة بدليل اللي بنوريهولكم ده.. لا بد المسؤول يكون عنده سياق لوظيفته، وده مكملات الوظيفة".

واستطرد السيسي: "بعد اللي حصل في 2011 وغضب الناس، جزء كبير منه إننا مكانش عندنا سياق نتكلم فيه مع الناس للواقع، ونقول الحكاية إيه، وليه وصلنا لكده، علشان لو ما أخدناش بالنا من حالنا هيحصل كده تاني".

وأضاف السيسي: "فيه محور في مدينة نصر عند المساكن تحت سلك الكهرباء، يا دكتور شاكر شيله خلينا نفتح المحور ده"، ورد وزير الكهرباء على الرئيس: "مفيش مشكلة يا فندم بس نشوف التكلفة قد إيه"، فضحك السيسي وقال: "الدكتور شاكر بقى صعب جدا".

وأكد الرئيس: "علشان نشيل المحور نوصله للسويس هيعمل انفراجة كبيرة جدا في المنطقة دي، بس هتضطر تخش في نطقة مش مخططة وهي الهجانة".

وقال السيسي للمحافظ غاضبا: "قولي بيجيلك فلوس كام كل شهر؟"، فرد المحافظ: "القاهرة يا فندم؟"، فرد السيسي ضاحكا: "خليك في القاهرة بس"، ودخل الرئيس والحضور في نوبة من الضحك، وطلب السيسي من المحافظ أن يعود إلى مقعده بعد أن أنهى كلمته.

وافتتح الرئيس عبدالفتاح السيسي، اليوم، عددًا من المشروعات التنموية في مقدمتها محطة معالجة الصرف الصحي بالجبل الأصفر، ومشروع "المحروسة 1"، الذي يعد أحد مشروعات تطوير العشوائيات ويقع بمدينة النهضة بحي السلام بمحافظة القاهرة، تمهيدًا لإعلان مصر خالية من العشوائيات.

ويضم "المحروسة 1" مشروع نحو 4900 وحدة سكنية، وعددًا من المحال والمكاتب والوحدات الإدارية في المشروع، لخدمة سكان المناطق العشوائية غير الآمنة، وتبلغ المساحة المخصصة للمشروع نحو 60 فدانًا، منها 37.4 فدان مخصصة للعمارات، و14.2 فدان مخصصة للخدمات، و8.4 فدان مخصصة للطرق وممرات المشاة، بجانب 2.7 فدان للمناطق الخضراء والفراغات العامة.