85 ميدالية فى القوة البدنية من غير إمكانيات.. عاش يا بطل

غرفة ضيقة تابعة لملعب مركز شباب أبودشيشة بمركز بلقاس بالدقهلية، حيث لا كهرباء ولا حمامات، فقط «بار حديد» و200 كيلو حديد، ودكة خشب، وغرفة 3×3 متر، مشتركة مع لعبة كرة القدم، خرج منها شاب يُدعى أسامة الباز على عبداللطيف، موظف بإدارة الأوقاف، استطاع أن يصل إلى المركز الرابع على العالم فى قوة الذراعين.

داخل منزله وفى حجرته الخاصة حائط كامل معلق عليه الميداليات وشهادات التكريم التى حصل عليها من 75 بطولة جمهورية، و10 بطولات دولية، وصور تذكارية مع قيادات رياضية ومحافظى الدقهلية السابقين أثناء التكريمات التى حصل عليها: «أفتخر بأننى من غرفة لا تتعدى مساحتها 3 أمتار، مفيش إمكانيات، لكن قدرت أجيب بطولات وميداليات، لو كان عندى إمكانيات أكبر كنت جبت المركز الأول فى أى مسابقة».

بدأ «أسامة» اللعبة عام 2006 من استاد المنصورة الرياضى، وبعدها شارك فى بطولات، وحصل على 75 بطولة جمهورية، قوة بدنية ومصارعة ذراعين، وحصل على البطولة العربية الخامسة، والمركز الأول فى البطولة الأفروعربية، وشارك فى بطولة العالم عام 2009، وفى بطولة أقوى رجل فى مصر.

ورغم ضعف الإمكانيات يصر على الوصول إلى أعلى المستويات: «أسافر 3 مرات أسبوعياً للمنصورة، وده بيكلفنى كتير، وطبقاً للوائح الاستاد بيدفع لى بدل سفر 150 جنيه شهرياً، وأحصل على الحافز الرياضى فى آخر السنة.

مركز الشباب اللى بتدرب فيه بدون إضاءة وبدون حمامات ومفتوح طول اليوم بدون تأمين، لما أشارك فى مسابقة دولية بشوف لعيبة الدول التانية لابسين زى موحد وبيتمرنوا بطريقة مختلفة، إحنا معندناش ده».

يتمنى «أسامة» من القائمين على جهاز الرياضة أن ينظروا إلى مراكز الشباب نظرة مختلفة، وإلى الأبطال الذين يستحقون نظرة اهتمام: «الألعاب الفردية محدش مهتم بيها، ولو محدش وفّر لى إمكانيات مادية كلها 3 سنين وأعتزل، وأنا أحمّل المسئولية للقائمين على الرياضة، إحنا فى الألعاب الفردية بنعانى ومحدش سائل فينا». وبغرض التسهيل عليه يتمنى «أسامة» الحصول على شقة فى الإسكان الاجتماعى للشباب فى المنصورة أو جمصة، حتى يكون بالقرب من أى مركز للتدريب، ليحافظ على المستوى الذى وصل إليه.

• شباب أبودشيشة
• بطولة الجمهورية
• الأوقاف
• قوة بدنية ومصارعة ذراعين
• الألعاب الفردية
• شباب أبودشيشة
• بطولة الجمهورية
• الأوقاف
• قوة بدنية ومصارعة ذراعين
• الألعاب الفردية