بريد الوطن| بنتى
بريد الوطن| بنتى
بنتى اللى بتخاف م الفراولة
ولا ليها قوة ولا ليها حول
إزاى هتقدر يا ناس قولوا لى
تقف معاكم على طرف طاولة
تمسك عضام.. لحصان وجثة
وتشوف لسان وسنان ولثة
وتمد إيدها بالدور مناولة
دى يا رب بتخاف م الكلاب
وبتترعش وتاخدها مد؟
إزاى هتقدر يا الشباب
تمسك خروف وتجيبه أرض؟
دى يَدوب تداوى عصفور كنارى
وإن كان ضرورى حتماً لا بد
تكون طبيبة لزهور وورد
بنتى العنيدة ردت وقالت
كل الصعاب يا أمى هانت
ورسالتى إنى أكون قوية
وأكون طبيبة للإنسانية
سهل إنى أسمع شكوى لمريض
لكن اللى أصعب من ده أكيد
إنك تداوى تمنح سلام
لكل عاجز عن الكلام
مش أى دكتور راجل وست
لازم تكون ف الأصل vet
نجلاء نعيم
يتشرف باب "نبض الشارع" باستقبال مشاركاتكم المتميزة للنشر، دون أي محاذير رقابية أو سياسية، آملين أن يجد فيه كل صاحب رأي أو موهبة متنفساً له تحمل صوته للملايين.. "الوطن" تتلقى مقالاتكم ومشاركاتكم على عنوان البريد التالي
bareed.elwatan@elwatannews.com
