الزى المدرسى من مصانع «بير السلم»: أحسن من مفيش

10:39 م | الأحد 29 يوليو 2018

ترتفع أسعار الزى المدرسى كل عام ارتفاعات متفاوتة، تختلف من محل إلى آخر، ومن مدرسة إلى أخرى، وهو ما يزيد العبء على أولياء الأمور، ويجعلهم يتجهون إلى المصانع التى تقلد الزى المدرسى، باعتبارها أقل سعراً وأحياناً أكثر جودة، حيث تسعى هذه المصانع إلى تقديم ملابس مشابهة تماماً للزى المدرسى لأغلب المدارس بأسعار مخفضة وجودة أفضل.

بعض المصانع تبيع الزى الخاص بالمدارس الحكومية بأسعار تتراوح بين 120 و130 جنيهاً للطقم، أما المدارس الخاصة فتتراوح بين 250 و300 جنيه: «إحنا بنبيع بالقطاعى وبالجملة، فيه أولياء أمور بيطلبوا بالقطعة لعيالهم واللبس اللى عايزينه بنعمل زيه بالظبط»، بحسب أشجان محمد، مسئولة البيع فى أحد المصانع، بمحافظة الإسكندرية، التى تؤكد أن بعض المدارس لا تجبر أولياء الأمور على شراء الزى المدرسى من المدرسة نفسها، وهو ما تستغله بعض المحال التجارية برفع الأسعار: «ده بيخلى كتير يلجأوا للمصنع بتاعنا عشان يشتروا لبس يوفر عليهم».

{long_qoute_1}

يقدم المصنع عروض تخفيض للبيع بسعر الجملة، فهناك بعض أولياء الأمور يتعاونون مع بعضهم البعض لشراء قطع جماعية من الزى المدرسى، مقابل الحصول على تخفيض لهم جميعاً: «المصنع بيطلع القطعة بـ110 بس لو ناس كتير هتشترك مع بعض ويشتروا دستة».

مصنع آخر فى منطقة المرج، يبيع الزى للمدارس الحكومية بأسعار تتراوح بين 95 و105 جنيهات، أما الزى الخاص بالمدارس الخاصة فتصل أسعاره إلى 150 جنيهاً، ولا تختلف الأسعار باختلاف المرحلة العمرية، كما يقوم المصنع بخدمة الشحن للمحافظات الأخرى مقابل زيادة 30 جنيهاً: «اللى بيودى ابنه المدارس النهارده فى ظل الأسعار دى ما بيصدق يدفع له المصاريف، فأى حاجة بعد كده بيضطر إنه يجيبها بأسعار بسيطة»، بحسب مصطفى هانى، صاحب المصنع، الذى اعتاد على تفصيل الزى المدرسى، منذ ما يقرب من 3 سنوات ماضية، وبيعه للمحال أو أولياء الأمور: «وكمان بنكتب اسم المدرسة على التيشيرت لو حبوا عشان يبقى زى الأصلى بالظبط».

«دى تانى سنة هشترى لولادى من المصانع اللى بتعمل هدوم المدرسة بتبقى زيها بالظبط وأرخص من اللى بتبيعه المدرسة»، بحسب نجلاء مصطفى، إحدى أولياء الأمور، التى تشترى من المصانع نظراً لغلاء أسعار الزى المدرسى فى المحال المتعاقدة مع المدارس: «كده ولّا كده كله لبس وبيتغير كل سنة».