مسحراتي اليوم الثامن والعشرين

وأنا صنعتى

مسحراتى

فى البلد جوال

حبيت ودبيت

كما العاشق

ليالى طوال

وكل شبر

وحتة من بلدى

حتة من كبدى

حتة من موال:

أيام ما كان الظل لسه بيحبى

تحت نور الفانوس

والرَّبع كان مأنوس

أيام تسعتاشر إلى أربعين

مش عارفة هى بخيرها ولّا فى

آخرها

الطيبين فى الدنيا والطيبات

دايماً قلوبهم نبات

كان فيه نقَا

شَكَر اللى طل وسقى

عارف ما حدش جميل

غير اللى قد الشقا

فوت يا زمان على مَهلك

سلم على أهلك

سبّح بحمد العليم

على ضى صوت الشيخ محمد رفعت بيقرا فى الذكر الحكيم

الدنيا فجر مجاور السيدة

والمغربية يلالى ألف هلال

والأرض تخشع للجلال

للأمر بالمعروف

للرحمة تجمع امهات الحروف

يا اهل الحوارى فى سنين الاحتلال

الشوق غنّى والجنة للمظاليم

ومصر حلفت بانتصار اليتيم

المشى طاب لى

والدق على طبلى

ناس كانوا قبلى

قالوا فى الأمثال

الرجل تدب مطرح ما تحب.

• الشيخ محمد رفعت
• مسحراتي
• بركة رمضان
• مسحراتي اليوم الثامن والعشرين
• شهر رمضان
• رمضان 2018
• مسحراتي رمضان
• الشيخ محمد رفعت
• مسحراتي
• بركة رمضان
• مسحراتي اليوم الثامن والعشرين
• شهر رمضان
• رمضان 2018
• مسحراتي رمضان