بريد الوطن| ولو هميت
بريد الوطن| ولو هميت
مقلتش يوم «أنا يوسف»
ولا قلتى «أنا عايزاك»
ولو فسرتى يوم حلمك
أنا الخمر اللى معصورلك
وأنا الشارب مرار صبرك زعاف فتاك
وأنا المصلوب ف إحضانك
بتنقر راسى غربانك
ولابس فوق جبينى التاج من الأشواك
وليه تراودينى عن ألمك
وألملم فيكى وألمّك
وينسج خيطك الملعون لقلبى شباك
ولو هميت ف يوم بيكى
مفيش برهان ينجيكى
فخلينى وخليكى.. أنا ف بيرى
وانتى ف قصرك اللى هناك
ويكفينى.. أقف طول عمرى طوابيرك
وأملى تذكرة لخيرك
وكل خطوة تخطيلك
بتبعدنى عن الشباك
وأصوم عنك وأنا العطشان
تمدى موائد الرحمن لأغرابك
وسيبانى أنا الغلبان على بابك
عشان مملكش فيكى غيطان
نجلاء نعيم
يتشرف باب "نبض الشارع" باستقبال مشاركاتكم المتميزة للنشر، دون أي محاذير رقابية أو سياسية، آملين أن يجد فيه كل صاحب رأي أو موهبة متنفساً له تحمل صوته للملايين.. "الوطن" تتلقى مقالاتكم ومشاركاتكم على عنوان البريد التالي
bareed.elwatan@elwatannews.com
