شكاوى من نقص لبن الأطفال «فرى لاكتوز».. وصيدلى: «مش موجود نهائياً»

09:41 م | الأحد 11 مارس 2018

شكا عدد من الأهالى اختفاء لبن «فرى لاكتوز إف إل» الخاص بالأطفال الذين يعانون من حساسية سكر اللاكتوز. وقالت سميحة عبدالعال، 55 سنة: «أنا بقالى كام يوم بلفّ على الصيدليات هنا فى الدقى عشان حفيدى اللى عنده 9 شهور، وجوز بنتى برضه بيسأل فى مكان شغله فى الحوامدية، وكنا بنجيب علبة اللبن بـ80 جنيه، ودلوقت مش لاقيينه، وكل ما أسأل يقولوا لى اللبن لسه مجاش».

وأضافت «سميحة»: «الولد عنده حساسية من اللاكتوز، وكان بيقعد يعيط ومانعرفش ماله، لحد ما الدكتور قال لنا السبب، وهو ده اللبن الوحيد اللى بيرتاح عليه، ومفيش حاجة تانية نقدر نديها له، والدكتور حذرنا من أى لبن تانى فيه لاكتوز عشان مايحصلهوش أى مضاعفات، والخوف دلوقتى إنهم يشيلوه من الصيدليات خالص، ويرجعوه تانى بسعر جديد وغالى، وساعتها هنضطر نجيبه أياً كان السعر»، وتابعت: «اللبن ده يُعتبر دواء، ومانقدرش نستغنى عنه، وممكن يغلوه شوية ماشى، بس برضو يكون فى المعقول، عشان الناس الكتير الغلابة اللى أطفالها تعبانين برضو يقدروا يجيبوه».

{long_qoute_1}

ويقول محمد حسن السيد، صيدلى بإحدى صيدليات مصر الجديدة: «فيه أطفال عندهم حساسية من تناول اللبن اللى بيحتوى على سكر اللاكتوز، والحساسية دى بتظهر على شكل غازات فى البطن ومفيش هضم، وأحياناً احمرار فى الجسم، فبنضطر نصرف لهم لبن تانى مافيهوش لاكتوز»، مشيراً إلى أن هناك طفلاً مصاباً بهذا النوع من الحساسية من بين كل 10 أطفال.

وأضاف «حسن»: «فيه نقص فى ألبان الأطفال كلها، واللبن ده على وجه التحديد، ولما بينزل، بينزل بكميات قليلة جداً، يعنى ممكن الصيدلية ينزل لها علبتين أو تلاتة، وبقاله أكتر من شهرين مش بينزل نهائياً، وفيه بعض الأنواع بيوصل سعرها لـ200 جنيه»، وتابع «حسن»: «مفيش شركة متخصصة فى صناعة اللبن ده بس، ولكن شركات اللبن العادى بتنزل اللبن الخالى من اللاكتوز ده مع المنتج بتاعها، فممكن ده يكون أحد أهم أسباب النقص، بالإضافة لمشاكل الاستيراد والجمارك، وحالياً مفيش بديل للنوع ده ومفيش أى معلومة عن ميعاد توفره تانى فى الصيدليات».

وقال باسم صلاح، صيدلى بإحدى صيدليات منطقة الدقى: «اللبن ده بيتصرف من غير روشتة، ومن أهم أسباب نقص الأدوية أو الألبان بشكل عام من الصيدليات إن بييجى الشخص ويشترى 3 أو 4 علب هما دول اللى بيكونوا أصلاً متوفرين فى الصيدلية وممكن مايضطرش إنه يستعمل الكمية دى كلها وبتتركن عنده فى البيت، فالأهالى برضو بتساهم بشكل كبير فى النقص اللى بيحصل كل فترة ده».

وقال مصدر مسئول بصيدلية الإسعاف، رفض ذكر اسمه: «الصيدلية حالياً بتعانى من نقص عام فى ألبان الأطفال ولبن الحساسية بشكل خاص، وكل فترة كده بييجيلنا كرتونتين، والكرتونة بيكون فيها نحو 20 علبة، وفى الوقت الحالى يوجد عدد محدود من لبن الحساسية الخاص بالأطفال التابع لشركة بيبيلاك، بسعر 78 جنيهاً، والصيدلية هنا مابتوفرش غير اللبن اللى بتنتجه الشركة دى بس، والطلب عليه متزايد بشكل كبير وأتوقع نقصاً فى الأيام المقبلة»

من جانبه، أكد مصدر بوزارة الصحة والسكان توافر ألبان الأطفال المدعمة فى وحدات الرعاية الصحية الأساسية، ووحدات الأمومة والطفولة التابعة لوزارة الصحة، موضحاً أن هناك 1008 مراكز تتوافر لديها تلك الألبان.

وأضاف المصدر أن الاجتماع الدورى بشأن ألبان الأطفال، الذى عُقد نهاية ديسمبر الماضى، بمشاركة وزير الصحة، وممثلى وزارات الدفاع، والصحة، والرقابة الإدارية، بالإضافة للتواصل هاتفياً مع رئيس الشركة المصرية لتجارة الأدوية، التابعة لوزارة قطاع الأعمال العام، انتهى لتوافر احتياجات السوق من ألبان الأطفال لمدة 7 أشهر، مر منها 3 أشهر حتى الآن.

ولفت المصدر إلى أن مصر تستهلك من ألبان الأطفال مليوناً و400 ألف عبوة شهرياً، وأن التقرير الذى نوقش خلال الاجتماع انتهى لوجود مخزون يكفى لشهرين فى مخازن «الصحة»، وشهرين فى الشركة «المصرية لتجارة الأدوية»، وإمكانية إمداد جهاز مشروعات الخدمة الوطنية، التابع لوزارة الدفاع، للسوق باحتياجاته لشهرين آخرين.

وأشار المصدر إلى أن مصنع «لاكتو مصر»، الذى استحوذت عليه شركة «أكديما»، المملوكة للدولة، مؤخراً، سيبدأ فى إنتاج 50% من احتياجات السوق من ألبان الأطفال من منتصف العام الحالى، على أن يتوسع لينتج كل احتياجات السوق فى العام الذى يليه.