بريد الوطن| لقاء العقول وصالون جامعة القاهرة الثقافى
بريد الوطن| لقاء العقول وصالون جامعة القاهرة الثقافى
من الموقع الإلكترونى للمركز الألمانى للإعلام التابع لوزارة الخارجية الألمانية، تقول الحكمة الألمانية: «العقول المتشابهة تبحث عن بعضها، والعقول العظيمة لها نفس التفكير»، أنا بس عايز أعرف إحنا بنعمل إيه عشان نوفر فرصة لتلاقى العقول؟ طيب ممكن الإعلام والكتّاب والمهتمين يعرفّونا فى ألمانيا مثلاً بيعملوا إيه عشان يوفروا فرصة لتلاقى العقول؟
الغريب إن الصالون الثقافى اللى لسه معمول من قريب داخل جامعة القاهرة متاح للطلبة فقط.. طب ليه مش متاح لكل الناس، رغم إن الخبر اللى اتنشر عنه فى أول إقامته كان: «يشار إلى أن الصالون الثقافى هو أحد مخرجات وثيقة الجامعة للثقافة والتنوير التى تم صياغتها والإعلان عنها خلال شهر أكتوبر 2017، ويستهدف إدارة الحوارات بين طلاب الجامعة وضيوف الصالون من مفكرين وكتّاب حول بعض القضايا التى تهمهم وتجتذبهم».. وفى جريدة «الوطن» كتب الكاتب أحمد المسلمانى: «لقد بدأتُ مع أصدقاء أجلاء فى تأسيس منتدى خريجى جامعة القاهرة ليكون جمعية أهلية تعمل من أجل الدعم الفكرى والمساندة الشاملة للجامعة الأم فى بلادنا، إننى أدعو نخبة خريجى جامعة القاهرة للمشاركة فى أعمال المؤتمر التأسيسى للمنتدى الذى ننوى إطلاقه قريباً».
الغريب أنه لم يدعُ كل المصريين الذين عندهم استعداد للمشاركة، اقتصرت الدعوة تانى على النخبة! أنا بس عايز أعرف، مين هينقل فكركم للناس؟ ومين هيقول لكم إن فكركم ده قابل للتطبيق؟ طيب هتقيسوا تفاعل الناس معاكم إزاى؟ أنا أتمنى إن الجامعة تفتح أبوابها لكل الناس وتسمع مشاكلهم، وتحاول تحل المشاكل دى بطرق علمية وعملية، صعبة الأمنية دى؟ كما أتمنى إن د. الخشت يوصل له الكلام ده، لأنه قال: «جامعة القاهرة تعمل على استغلال وتوظيف المعارف والعلوم لخدمة المجتمع»، يبقى تفكر معانا الجامعة فى كل مشاكلنا اقتصادية واجتماعية، دايماً بقول لسه فيه ناس كويسين كتير جداً فى بلدنا، ونفسى حد يتبنى ثقافة البحث عن العقول.
محمد - واحد عادى
يتشرف باب "نبض الشارع" باستقبال مشاركاتكم المتميزة للنشر، دون أي محاذير رقابية أو سياسية، آملين أن يجد فيه كل صاحب رأي أو موهبة متنفساً له تحمل صوته للملايين.. "الوطن" تتلقى مقالاتكم ومشاركاتكم على عنوان البريد التالي
bareed.elwatan@elwatannews.com
