15 نصيحة عليك فعلها قبل وخلال "انترفيو" العمل
15 نصيحة عليك فعلها قبل وخلال "انترفيو" العمل
غالبا ما يشعر الشخص بقلق وتوتر عندما يكون لديه "إنترفيو" أو مقابلة للحصول على وظيفة، كونها سيترتب عليها قبوله أو رفضه بالالتحاق بالعمل.
ويقدم مصطفى خليفة، استشاري تطوير الأعمال، 15 نصيحة للقيام بها قبل وخلال مقابلات العمل.
قبل المقابلة:
1. عند استلام اتصال من مسؤول التعيينات أو الموارد البشرية، من الضروري أنك تسأل هقابل مين وإيه الوظيفة اللي كلموني عشانها لو أنا من الأول مش مقدم في وظيفة معينة أو هما وصلوا لسيرتي الذاتية عن طريق مواقع التوظيف، مهم جدا أعرف لو فيه لبس مناسب، هل هتكون المقابلة بالزي الرسمي الكامل ولا نصف رسمي.
2. معرفة العنوان كويس، وأحاول أحدده على الخريطة قبل ما أروح، أسجل تليفون اللي كلمني واستأذنه أني ممكن أكلمه لتوضيح العنوان يوم المقابلة أو لو اتأخرت لا قدر الله تتصل تعتذر.
3. أذاكر كويس الشركة اللي أنا رايحها والوظيفة اللي أنا مقدملها، وكمان أعرف الشخص اللي مقابله وأدور عليه على مواقع التوظيف وأحاول أعرف عنه أكتر "خبراته توصيف عمله"، لأن ده هيفدني في طريقة كلامي معاه واختيار هركز معاه في إيه اكتر، وجميل أوي لو لقيت أصدقاء مشتركين أو شركات مشتركة بينك وبينه عشان تستخدمها في كسر الحاجز في أول اللقاء.
4. تحضير الأسئلة اللي من الممكن طرحها، فيه أسئلة عامة زي أنت عايز تسيب شركتك ليه وشايف نفسك فين بعد فترة والمرتب المتوقع، وفيه أسئلة خاصة بطبيعة الوظيفة والمهنة اللي أنت شغال فيها، رتب أفكارك واستعد بردود مناسبة.
يوم المقابلة:
5. مهم جدًا ارتداء ملابس مريحة بالنسبة لك ولبس أنت متعود عليه عشان ده بيديك راحة وثقة وبيشيل من دماغك توتر إذا كان لبسك كويس أو لأ.
6. روح قبل ميعادك بربع ساعة على الأقل، احسب مشوارك واتحرك قبلها بمدة لازمة واحسب الزحمة والركنة أو المواصلات، مهم أوي تروح وأنت مرتاح ومش متوتر أو مستعجل.
7. تهتم جدا بالتواصل سواء الترحيب أو السلام بالأيد وكمان التواصل بالعينين، خليك واثق في نفسك، جزء كبير من قبولك في أي وظيفه شخصيتك، اظهرها بأفضل طريقة.
8. وضع جسمك مهم جدًا، الابتسامة والجلوس بطريقة مناسبة لا تبين توترك أو خوفك ولا تبان أنك مش مهتم أو مغرور، الجلوس يكون مناسب وفي وضع مستقيم و"استنى يشاور على الكرسي المناسب للجلوس عليه".
9. اتكلم بهدوء وبطء ووضوح، ماتحاولش تبقى سريع في الكلام لأنه طبيعي مع التوتر، سرعة الكلام بتزيد، فكر نفسك كل شوية أنك تتكلم ببطء ووضوح، مهما حصل متتوترش أو تفقد أعصابك لأي سبب، حافظ على هدوئك.
10. اسمع الأسئلة كويس، وخد وقت وفكر كويس قبل ما ترد، الاستماع مهارة لازم تبقى متمكن منها، وده جزء من تقييمك، لازم تسمع وتبين اهتمام بالكلام اللي بيتقال.
11. جاوب على كل الأسئله بأمانة: "لأننا في وقت المعلومات فيه متاحة، وبالتالي التأكد من كلامك سهل لأي شركة، خليك صادق وصريح، وده بيدي ثقة وبيبان في طريقة كلامك".
12. حاول على كل سؤال الإجابة بشكل متكامل، قول خبرتك بشكل قصة، وركز على الإنجاز فيها ودورك إيه بالتحديد، وتكون رابط كلامك بالسيرة الذاتية بتاعتك عشان ميبقاش فيه اختلافات ما بينهم.
13. لو فيه إنجاز مهم في حياتك أو وظيفة أو مشروع، ممكن تتكلم عنه حتى لو متسألتش، لكن اختار الوقت المناسب اللي تتكلم فيه، ودايما اختار الموضوعات اللي ليها علاقة بالوظيفة والشركة اللي أنت متقدملها.
14. تفاعل مع اللي بيقابلك، حضر أسئلة تسألهاله عن الشغل وطبيعة العمل والشركة، خد وقتك وجهز أسئلة تبين أنك مهتم وأنك فاهم طبيعة الشغل ومتركزش على أسئلة الغياب والحضور وعدد ساعات العمل بس لأن ده بيدي انطباع مش مناسب.
15. خلص المقابلة بطريقة مناسبة، ألقي التحية واسأل إيه الخطوات بعد كده، غير أنك هتعرف معلومات مهمة كمان هتبين أنك مهتم بالوظيفة.
