5 علامات تؤكد أن "شغلك هيستغنى عنك"
5 علامات تؤكد أن "شغلك هيستغنى عنك"
أحيانا لا يستطيع الموظف معرفة أو اكتشاف إذا كان في وضع خطر داخل عمله ومن الممكن الاستغناء عنه، وفي حالة تأكده من ذلك لا يعلم كيف يمكنه التغلب على الأمر وإنقاذ نفسه من خطر الفصل.
ويشرح مصطفى خليفة، استشاري تطوير الأعمال، 5 علامات تجعلك تشعر أنك في خطر ويمكن الاستغناء عنك، وكيفية التغلب على الأمر والخروج منه بسلام.
أولا: تكليفك بالأعمال الروتينية فقط
يعني كل المهام والأعمال اللي بيتم تكليفك بيها فجأة تبقى مفيهاش إبداع أو مسئولية أو خطورة، فتلاقي كل الشغل بتاعك منحصر في أعمال روتينية فقط.
ثانيا: طريقة micro-management
فجأة تلاقي مديرك مش بيديك مساحة للشغل، يعني يلزمك ترجع له في كل كبيرة وصغيرة وإنت بتعمل تكليفات الشغل، وكل ما تنجز جزء من التكليف تعرضه عليه وتكمل اللي بعده، ودي طريقة اسمها micro-management، خد بالك لو إنت خريج حديث أو بتعمل شغلانة جديدة يبقى أسلوب الإدراة ده طبيعي، بس مش الطبيعي إن يبقى عندك خبرة في مجالك ولسه بترجع في كل خطوة لمديرك.
ثالثا: أن تكون غير مؤثر
لو شغلك مش بيأثر في صلب الشغل بتاع الشركة Business core، ومفيش أي حاجة أو مهام أخرى مترتبة عليه، فده معناه إنه مالوش أهمية، فبالتالي يمكن الاستغناء عنك بسهولة.
رابعا: عدم الثقة
أي عمل مهم أو فيه خطورة، أو مستعجلين عليه، بيتم تكليف ناس تانية في الفريق بيه، وده معناه إن مفيش ثقة في قدرتك على تنفيذ المهام المطلوبة.
خامسا: تهميشك
وجود اجتماعات كتير أو مخاطبات كتير إنت مش موجود فيها، وده معناه إنهم مش مهتمين يعرفوك بكل الأخبار لأنه مش هيأثر عليك، وده لأن شغلك مش مؤثر.
- بعد ما تعرف إنهم ممكن يستغنوا عنك، لازم تسأل نفسك إنت بضيف إيه للمكان اللي إنت فيه، وليه إنت مش الاختيار الأول لأي مهمة جديدة، عشان كده لازم تشتغل على نفسك من خلال المحاور دي:
1- تطوير قدراتك ومهاراتك من خلال تحديد رؤية لنفسك ومعرفة وضعك الحالي على حقيقته، وبعدها تحليل احتياجاتك للوصول للرؤية دي، واشتغل باجتهاد إنك تعوض اللي فاتك.
2- تحسين وسائل التواصل بتاعتك مع زملائك ومع مديرك، ممكن يكون من أسباب الاستغناء عنك الصعوبة في التواصل والتعامل معاك.
3- حل كل المشاكل والصراعات، مهم قوي ميبقاش عندك مشاكل مع فريق العمل أو علاقات متوترة، ومهم كمان حل أي مشكلات بسرعة والوصول لتسوية مناسبة للطرفين.
4- إظهار رغبتك في العمل، مهم توضح في كل اجتماع أو حديث إن عندك شغف للشغل وإنك عايز تاخد مساحة أكبر وتتعلم مهارات جديدة، لأن إظهار ده بيزود استعداد المديرين إنهم يسندوا ليك مهام أكتر.
5- المساهمة في الأعمال المختلفة في الإدارة وخصوصا الأساسية Business core، سواء اتكلفت بيها أو لأ، معرفتك بالشغل الأساسي بيديك فرصة إنك تدخل في الصورة وتبين روح التعاون ورغبتك في الشغل.
6- الالتزام الحقيقي بتنفيذ الشغل بأفضل شكل وأسرع وقت، والرجوع للمدير في حالة وجود حاجة مش واضحة أو لطلب النصيحة، رجوعك في المواقف الصحيحة بيدي اطمئنان إنك هتخلص شغلك مظبوط، وبيزود الثقة، على عكس اللي بيرجع لمديره عمال على بطال أو اللي مش بيرجع له خالص.
- في النهاية لازم نعرف أننا لو مكملناش في شغلنا ده مش نهاية الحياة لا ليك ولا للشركة، الأهم إنك تبقى عضو فعال في المكان اللي إنت فيه، وتكون بتقدم قيمة حقيقيه للفريق وللشركة.
