5 خطوات لزيادة وتطوير العمل بينها "سفر ولعب وجوائز"
5 خطوات لزيادة وتطوير العمل بينها "سفر ولعب وجوائز"
تطوير العمل وروح الفريق المتعاون بشكل دائم لا يأتي دون السعي وراء ذلك من رؤساء الشركات.
فتعتمد كل المؤسسات والشركات بشكل رئيسي على مواردها البشرية الذين يقومون بالأعمال المختلفة من أجل تحقيق النتائج وتطوير الأداء، ولا يتحقق ذلك بمجهود الأفراد دون أن يكونوا فريقا واحدا، فهناك مقولة شهيرة تقول "الأفراد بيفوزوا بالألعاب ولكن الفرق تفوز بالبطولات"Individuals win games but teams win championships"، لا يستطيع الفرد العمل بكل المهام حتى وأن كان متميزا أو يتمتع بعدة مواهب فلابد أن يكون هناك تكامل بين الفريق.
ولذلك يُقدم مصطفى خليفة استشاري تطوير الأعمال بعض الأفكار التي تعمل على تزويد روح الفريق والتعاون بين الأفراد.
أولا:
- أنشطة بناء الفريق:
مؤسسات كتير وشركات بتلجأ لعمل أنشطة تبني بيها روح الفريق، وده بيعتمد على توصيل المهارات الأساسية من خلال ألعاب، مهارات أساسية زي التواصل وبناء الثقة والعمل في فرق والقيادة وغيرها، مثلا لو عايز أوصل مهارة التواصل في الفريق، ممكن نخلي حد من الفريق مغمي عينه وماشي في متاهة بتوجيهات من أعضاء فريقه، ده بيوضح أهمية التواصل والثقة، ألعاب تانية زي إننا نملى ميه في وعاء فيه فتحات وبالتالي ناس بتحاول تنقل ميه عشان تملى وناس بتحاول تسد الفتحات، وده بيبين أهمية دور كل واحد في الفريق.
ثانيا:
- أنشطة الفريق:
من الحاجات اللي بتساعد إن أعضاء الفريق يتواصلوا مع بعض بشكل كويس وتتشال الحواجز ما بينهم الأنشطة زي تنظيم مباريات كرة قدم أو بطولة عجل أو جري وغيرها، وممكن كمان تتنظم سفريات حتى لو ليوم واحد عشان تزود الترابط وتدوب الفروق.
ثالثا:
- التطوير من خلال الفريق Kaizen
ممكن تنفيذ مشروعات تطوير جوه المؤسسات ولكن بطريقة مختلفة، ممكن تحديد اماكن محتاجة تطوير أو مشاريع قابلة للتنفيذ، ونبتدي في كل منطقة أو فكرة منهم نفكر هنعمل إيه والنطاق المطلوب تحسينه ونجمع كل البيانات، وبعدها نعمل أحداث أو events كل حدث منهم ممكن يبقى يوم كامل او يومين، بنعمل في الحدث ده أعمال التطوير من خلال تحليل البيانات اللي جمعناها قبل الحدث واقتراح حلول من خلال أدوات التفكير الجماعي زي العصف الذهني، لحد ما نلاقي حلول ونطبقها في شكل جماعي، مهم جدا أن الناس اللي بتدعي للحدث ده تبقى من إدارات مختلفة cross-functional team ونكرر الموضوع ده كل شهر مثلا وكل مرة يبقى في إدارة بحيث إن كل الناس تبقى اتعرفت على كل الإدارات وعرفت المصاعب اللي بتواجهها وكمان ساعدت في تطويرها وحل مشاكلها، وده بنسميه Kaizen Events اللي بنستخدمها عشان نحقق التحسين المستمر ونزود روح الفريق.
رابعا:
- الحلول من خلال الفريق hackathons
بعض الشركات بتقوم بتنظيم hackathons وده فكرته أننا نحط مجموعة المشاكل اللي بتواجه الشركه سواء في مجال العمل نفسه أو لو مشاكل داخلية، ونعرضها في شكل مسابقة، كل مجموعة زملاء بيكونوا فريق ويختاروا مشكلة يشتغلوا عليها، ممكن الهاكاثون ده يستمر لمده يومين أو تلاتة، بنبتدي بتدريبهم على أدوات التطوير الموجودة في منهجية المؤسسات الرشيقه Lean Enterprises وكمان مهارات العرض وده بيبقى بشكل مبسط لمده 3 أو 4 ساعات، ونسيبهم لمده يوم أو يومين يعملوا مشاريعهم اللي ممكن يكون فيها تطبيق للمشروع كمان حتى لو بشكل مبسط prototype وفي أخر اليومين أو التلاتة بيعملوا عرض presentation للمشاريع والحلول بتاعتهم، ومن خلال لجنة تحكيم بنحدد مين أفضل مشروع وبيتم تكريمه.
أوقات الهاكاثون ده بيتعمل من الخميس آخر اليوم للسبت آخر اليوم، والفرق تبات جوه الشركة أو تروح وترجع، أوقات بنعمله في سفرية مثلا نقعد يومين أو تلاتة في مكان بره فندق مثلا وتتعمل هناك كل الأنشطة.
خامسا:
- الجوائز والمكافآت لأفضل الفرق
من الطرق الجيدة عمل مسابقة لأفضل فريق من خلال طلب كل سنة أو نصف سنة أو بشكل ربع سنوي من الفرق المختلفة تقديم شغلها لجايزة أفضل فريق، ويتعمل تصويت لاختيار أفضل الفرق يشارك فيه كل الموظفين في الشركة، بحيث إنهم يتكرموا سواء بجايزة أو ترقية أو تقدير.
كل دي أفكار بتساعدنا نحسن روح الفريق لأن من غير روح حقيقية فيها تعاون وتفاهم وتواصل، مش هنقدر نحقق الأهداف بتاعتنا.
