5 خطوات لتحديد رؤية صحيحة لمستقبلك

02:53 م | الخميس 30 نوفمبر 2017

دائما يسعى الشخص على التحسين من نفسه، للاستفادة في عمله سواء كان خاص أو موظف في إحدى الشركات إلا أن هناك الكثيرون الذين يبذلون مجهود كبير في عملهم لكن دون نتيجة فعالة أو مردود لهذا المجهود رغم أنهم يقدمون عملهم بشكل صحيح.

ويقول مصطفى خليفة، استشاري تطوير الأعمال أن على الأشخاص سؤال أنفسهم هل أنهم يجتهدون فقط أم يجتهدون في الطريق الصحيح، لأن أحيانا يجتهد الشخص دون وجهة صحيحة، وهدف يسعى له.

وفيما يلي بعض الخطوات لتحديد رؤيتك وكيفية الوصول إليها وفقا لاستشاري تطوير الأعمال:

- من أجل تحسين وتطوير النفس، أول حاجة لازم نعملها أننا نحدد رؤيتنا لنفسنا أو لشركاتنا، إحنا عايزين نبقى فين وده بنسميه الوضع المستقبلي To-Be ممكن كمان سنة أو اتنين أو حتى 5 سنوات، لما بتبقى 5 سنين بنسميها رؤية بعيدة المدى long-term vision ولو سنة بتبقى short-term vision، وممكن تبقى ما بين الاتنين، وده بيعتمد على مدة وضوح الرؤية ومدى ثبات الظروف المحيطة بينا، يعني لو في تقلبات في السوق صعب نحط رؤية لـ5 سنين.

- من المهم جدا وضع رؤية واضحة ومحددة، يمكن قياسها وتحقيقها، ومرتبطة برسالتك mission وسبب إنشائك لشركتك أو رسالتك في الحياة، بنطلق عليها SMART بمعنى محدد يمكن قياسها ويمكن تحقيقها، ولها علاقة بيك وبرسالتك ومحددة بوقت سنة أو تلاتة او خمسة.

- لازم تعرف وضعك الحالي بشكل جيد وتعرف إمكانياتك وقدراتك وده بنسميه معرفة الوضع الحالي، وهنا لازم التفريق بين الموارد والإمكانيات يعني مثلا ممكن يكون عندي معلومات كتير بس معنديش معرفة، وممكن يكون عندي أنظمة كتيرة لكن معنديش إجراءات، وممكن يكون معايا فلوس بس معنديش خبرة إدارة الفلوس.

- لازم دراسة الفجوة بين الوضع المستقبلي To-Be والحالي As-Is ونعمل تحليل Gap Analysis وتحديد إيه هي العناصر اللي محتاج اشتغل عليها، وده اللي بنسميها الاستراتيجيات، اللي بتطبيقها هتوصلني من نقطه أ لنقطة ب.

- لازم الاستراتيجيات دي تستهدف 3 عناصر أساسية تطوير الناس والأدوات والإجراءات فمثلا أطور الأدوات وأجيب نظام كمبيوتر بس الناس مبتعرفش تستخدمه، وممكن أدربهم عليه بس نظام الكمبيوتر ده بيضيع وقت الناس لأن الإجراءات اللي عملناها عليه لسه غير مناسبة وبتضيع الوقت، حتى على مستوى الأفراد، لازم خطة تستهدف المعرفة اللي عندي وأدرب نفسي على أدوات جديدة وهو أني أتعلم صنعه جديدة أو إزاي أعمل شغل أفضل.

- بعد كده لازم أحط خطة لتنفيذ الاستراتيجيات من خلال تقسيمها لأهداف ممكن تكون سنوية أو ربع سنوية أو شهرية حسب مدة الخطة وزي ما سبق وشرحنا تغطي الناس والأدوات والإجراءات.

- أما الخطوة الخامسة والأخيرة إني أدرس أدائي ومدى تقدمي في الأهداف، ولو لقيت أي حيود أو تأخير أو احتياج لتغيير الرؤية لظروف في السوق أعيد دراسة الموضوع وأخذ الإجراءات التصحيحية اللي من شأنها ترجعني تاني للطريق الصحيح بتاعي.

- وضوح الرؤية بيحددلي الطريق، ووضع استراتيجيات بيساعدني مطلعش خارج الطريق، ووضع أهداف ومؤشرات أداء بتساعدني على تحسين سرعتي على الطريق الصحيح، وبالتالي بالطريقة دي هضمن أني بعمل الحاجة الأصح صح.