«ملك الفيزياء وجنرال الإنجليزية ودكتور الأحياء».. حيل المدرسين لجذب الطلبة.. والأسعار تبدأ من 120 جنيهاً

07:47 م | الأربعاء 06 سبتمبر 2017

«بروفيسور الكيمياء»، «ملك الفيزياء»، «جنرال الإنجليزى»، «دكتور الأحياء».. كتابات ولافتات ملونة تملأ جدران الشوارع ومراكز الدروس الخصوصية، تلفت أنظار العابرين أمامها، للإعلان عن المدرسين وجذب الطلاب إليهم، ليبدأ الطلبة رحلة البحث عن الدروس الخصوصية، التى تمثل لهم «طوق نجاة» يصل بهم إلى بر النجاح والتفوق. جولة صغيرة فى منطقتى «شبرا الخيمة وبولاق الدكرور» كشفت عن أسعار الدروس التى حددها المدرسون فى هاتين المنطقتين، حيث إن النصف الأول للمرحلة الابتدائية تبدأ أسعار دروس الطلبة فيه من 120 جنيهاً للثلاث مواد الأساسية: عربى، حساب، إنجليزى، وتزداد القيمة بعض الشىء فى كل صف، لتصل فى الصفين الخامس والسادس إلى 135 جنيهاً لكل المواد، بينما اختلف الوضع فى المرحلة الإعدادية حيث تزداد المصاريف الشهرية فيها، بمتوسط يتراوح من 135 جنيهاً إلى 160 جنيهاً لجميع المواد.

{long_qoute_1}

فيما تبدل الحال لدى الطلاب المنتقلين إلى الصف الثالث الثانوى، التى تعتبر بمثابة «سنة تحقيق الآمال» لدى طلابها، حيث بدأت رحلة بحثهم عن المدرسين من أواخر شهر مارس، قبل إنهاء العام الدراسى، ليبدأوا الحجز مع من يرغبون فيه، والذين يختارونهم على حسب «السمعة»، على حد تعبيرهم.

وقالت ناريمان حسنى، إحدى الطالبات المنتقلات للصف الثالث الثانوى، من سكان منطقة شبرا الخيمة: «أنا دخلت علمى علوم، عشان نفسى أدخل كلية الصيدلة، وبدأت أحجز الدروس من آخر شهر 3، لأن المدرسين كلهم بيقفلوا الحجز على طول، وحجزت مع المدرسين اللى كنت بآخد معاهم السنين اللى فاتت، فى مركز مش خاص، وجبت معاهم درجات كويسة، فقلت أخلينى معاهم السنة دى كمان، بس هحجز خاص لأنه هيكون فيه متابعة أفضل والشرح كمان هيكون أحسن».

وأضافت «ناريمان»: «رحت عشان أحجز اتفاجئت بالأسعار، ماكنتش متخيلة إنها هتكون غالية كده، الإنجليزى حجزته بـ100 والشهر بـ120 جنيه، والعربى حجزته بـ50 جنيه استمارة و120 جنيه فى الشهر، والفيزياء حجزت بـ140 جنيه شاملة الاستمارة والكتب، والشهر 120 جنيه، والأحياء والجيولوجيا حجزت بـ120 لكل مادة والشهر بـ100 جنيه، والفرنساوى حجزته بـ60 جنيه والشهر بـ100 جنيه، والكيمياء بـ130 جنيه فى الشهر، والحجز بـ75 جنيه»، واختتمت كلامها بقولها: «ربنا يجيب ده كله بفايدة، ويقدر والدى على دفع الفلوس دى كل شهر». ومن جانبها، قالت منار علاء، طالبة بالصف الثالث الثانوى شعبة أدبى: «الدروس السنة دى غير أى سنة، يعنى أنا متعودة آخد دروس فى كل المواد من صغرى بس فى سنتر، لأنه أرخص شوية من الخاص، لكن السنة دى الوضع اتغير تماماً، لقيت كل مادة لازم أدفع لها فى أول شهر أكتر من 250 جنيه»، مشيرة إلى أنه لا يوجد فرق كبير فى أسعار المواد الأدبية والعلمية، فحسب قولها: «كل المواد الأدبية اللى هى الفلسفة وعلم النفس والتاريخ والجغرافيا، حجزت كل مادة بـ120 جنيه، غير الشهر 100 جنيه لكل منها، مع العلم إن عندى كمان اتنين إخواتى فى إعدادى وابتدائى، وبرضو بياخدوا دروس فى مراكز، حرام والله لولا إن مفيش شرح فى المدارس ماكنش حد خد دروس».

من جهته، قال طالب بالصف الثانى الثانوى، أحد سكان منطقة روض الفرج، طلب عدم ذكر اسمه: «الدروس بتزود عليا التعب، يعنى بارجع من المدرسة على الدروس، وأروح البيت الساعة 7 المغرب، مابلحقش أذاكر أى حاجة، بكون تعبان فبروح أنام، وأصحى أعيد اليوم من تانى»، معتبراً أنه إذا اعتمد على مدرسى المدرسة لا يستطيع الحصول على درجات عالية، قائلاً: «لو اعتمدت على شرح مدرسين المدرسة مش هنجح، لأنهم مش بيشرحوا كويس، لكن المدرس اللى باخد معاه بره بيشرح أبطأ، وبيتابعنى عن مدرس المدرسة».