بعد ارتفاع "السودانية".. مواطنون: "لن نشتري هذا العيد لحمة"

03:47 م | الثلاثاء 15 أغسطس 2017

فاجأ وزير التموين، الدكتور علي المصيلحي المواطنين، بقرار رفع سعر اللحوم السودانية خمسة جنيهات للكيلو الواحد، لتصبح 85 جنيهًا، وهو ما دفع مواطنون للغضب من القرار، خاصة من محدودي الدخل، الذي تمثل لهم اللحوم السودانية مصدر أساسي للطعام، لارتفاع أسعار اللحوم البلدي، بما يفوق قدرتهم الشرائية.

وتوقع عدد من أصحاب المجمعات الاستهلاكية، أن يزيد القرار من حالة الركود التي يشهدها سوق اللحوم منذ فترة.

وقال عامل بمجمع استهلاكي في منطقة الدقي، إنهم تلقوا القرار صباح الأحد، موضحًا: "اللحمة السودانية أرخص لحمة في السوق، هي لحوم الغلابة، ومش عارفين سبب رفع سعرها".

وأضاف لـ"الوطن": "سوق اللحوم يعاني من الركود أصلًا برغم اقتراب عيد الأضحى المبارك، لا بيع ولا شراء، من ساعة ما غلت مجاش زبون واحد يشتري لحمة".

وبأسى وغضب، قال محمد جمال مواطن يسكن في منطقة بولاق الدكرور: "حرام والله اللي بيحصل فينا، مابقيناش عارفين نعيش للأسف"، موضحًا: "أنا أرزقي على باب الله، ماليش مرتب ثابت، كنت متعود أجيب لعيالي لحمة بلدى كل يومين، لكن بعد ما غليت بالشكل ده، بقيت أجيبلهم لحمة مستوردة عشان سعرها كان مناسب معايا، لكن بعد الزيادة ديه مش هقدر أجيب لحمة"، مختتمًا قوله: "حرام جايين يزودوا سعرها فيه دخلة العيد، طب نجيب لحمة منين".

واشتكت أم محمد، 43 سنة، تسكن فى منطقة الجيزة، من زيادة الأسعار التى أصبحت تفاجئها بشكل يومي، فتقول: "مستنيين العيد عشان ده أكتر وقت بناكل فيه لحمة، وكنت عاملة حسابى إنى هجيب العيد ده لحمة مستوردة، عشان البلدى سعرها غلي أوي مش هقدر أجيب 3 كيلو ب400 جنيه على الأقل"، مكمله حديثها بقولها: "مش عارفة ليه مش حاسين بالناس الغلابة، دايما بيغلوا عليهم هما بس، ربنا يصبرنا على الغلاء اللى احنا فيه، ويقدرنا على العيشة".

ويقول عبدالله سيد، فى أوائل الأربعينيات، وأحد سكان بولاق الدكرور، إنه لجأ لشراء اللحمة السوداني، لأنها أرخص بكثير من البلدي، متابعًا: "كنت مرتب إني اشترى 2 كيلو لحمة مستوردة عشان أقضي بيهم العيد، لكن هما عمالين يغلوا فيها، مضيفًا بقوله: "لو فضلت اللحمة أسعارها في الزيادة كدة مش هنقدر ناكلها فى العيد، ومفروض يرحمونا شوية من الزيادات ديه لحد ما العيد يجي، على الأقل يسيبونا نفرح شوية فى العيد".

وأكدت منى محمد، 33 سنة، بمنطقة الدقى، أنها فوجئت بأن اللحمة زاد سعرها: "رحت اشتري لحمة زى ما اتعودت لقيت مكتوب على المحل ورقة عليها سعر الكيلو 85 جنيه، واستغربت جدًا أنا لسه شارياها من يومين، ما لحقتش تزيد يعني"، مختتمة كلامها: "والله أنا مش عارفة الدنيا رايحة بينا لفين، ولا الحكومة عاوزه تعمل فينا ايه".