«أميرة» تصنع فساتين لطفلتها من ملابسها القديمة: لبس الأطفال غالى

07:32 م | الاثنين 24 يوليو 2017

مرّ على ولادة طفلتها 8 أشهر، زيادة وزنها أدت إلى صعوبة ارتداء ملابس كثيرة ظلت متكدسة فى دولابها، فكرت فى طريقة لاستغلالها وتعويض غلاء ملابس الأطفال، فقررت أن تعيد تدوير الملابس القديمة لتصنيع ملابس تناسب طفلتها: «دولابى كان فيه 8 فساتين مش عارفة ألبسهم بسبب وزنى اللى زاد فقررت أعمل منهم فساتين لبنتى، خصوصاً إن لبس الأطفال غالى، والطريقة دى ماكلفتنيش أى حاجة».

اعتمدت أميرة عبدالكريم، 24 عاماً، على تفصيل الفساتين، يدوياً: «معنديش ماكينة خياطة فى البيت، ومش معايا اشترى واحدة فخيطت كل الهدوم على إيدى بالإبرة والخيط»، تصفحت «أميرة» مواقع الإنترنت وبرامج الأزياء والموضة من أجل تعلم التفصيل: «فى الأول كان تفصيل الفستان بياخد يومين تقريباً.. دلوقتى ممكن أخلصه فى ساعتين». وبحسب قولها: «الفستان بيبقى كامل من كل حاجة.. بعمل له الجزمة والتوكة، كله من نفس القماش عشان يبقى شكله شيك»، مؤكدة أنها قبل أن تراودها هذه الفكرة لم تكن تعرف شيئاً عن التفصيل: «فصّلت فستان جديد لبنتى عشان تلبسه فى العيد، وباقى القماش اللى فاضل ممكن أعمل منه أى حاجة فى البيت، حتى المايوه عملتهولها».

نجاح «أميرة» فى التفصيل لصغيرتها وتوفير الأموال التى كانت تتكبدها عند الشراء، جعلها تتجه إلى تعلم التفصيل من أجل نجلها الأكبر «حمزة» الذى يبلغ من العمر 3 سنوات: «الموضوع طلع موفر قوى، ومش بيكلفنى حاجة، هستعمل الهدوم القديمة لجوزى عشان ابنى الكبير».