مزاد أونلاين على «مكنة خياطة ودفاية تعمل بالكيروسين»

09:12 م | الاثنين 10 أبريل 2017

مزاد علنى لكنه غير تقليدى، لا جرس يدق ولا صوت يعلو بـ«آلا أونة.. آلا دو.. آلا تريه»، جمهوره لا يتقابلون وجهاً لوجه وإنما عبر شبكة الإنترنت فى مزاد «أونلاين» تنظمه باستمرار صفحة «هلاوس» على موقع الـ«فيس بوك»، تعيد الصفحة إحياء التراث القديم من خلال فتح مزاد علنى على قطع قديمة ونادرة، وحسب محمد نصار، مسئول الصفحة: «فيه ناس مزاجها كله فى إنها تجرى ورا الحاجات القديمة وتشتريها حتى لو غالية». عدادات سيارات، راديوهات قديمة، ودفايات تعمل بالكيروسين، ماكينات خياطة يدوى، سبرتايات قهوة، بعض المقتنيات التى تعرضها الصفحة مع تنويه «لا يصلح للعمل لكنه يحتفظ به للديكور»، وهناك معروضات حديثة يقوم صاحب الصفحة بشرائها من المحال المختلفة وعرضها على الصفحة ويكتب «قبل ما المزاد يخلص بنحذر بكومنت»، على أن يتم التواصل مع الفائز بالمزاد من خلال «الإنبوكس».

التوقيت المتاح للمزاد يتراوح بين 30 و60 دقيقة: «بنحط صورة الحاجة ونكتب عليها اسمها ومواصفاتها وسعرها.. وفيه ناس بتيجى لنا على الخاص تفاصل فى السعر»، يعتبر «نصار» أن المزاد الأونلاين أفضل كثيراً من القديم «الأول كان بيبقى فيه رسوم، دلوقتى بلايك وكومنت بقيت فايز فى المزاد، وأحياناً ما يفتتح المزاد بمبلغ 40 جنيهاً». يوفر مزاد «هلاوس» الإلكترونى خدمة التوصيل للبيوت داخل محافظة القاهرة فقط: «يعنى أى حد يقدر يشارك فى المزاد وهو فى بيته وكمان توصل له القطعة اللى زايد عليها لحد عنده»، أغلب المنضمين إلى المزادات اليومية من الفئات العمرية الكبيرة التى تبدأ من 40 عاماً فأكثر: «الناس الكبيرة هى اللى بتحب تسترجع أيام زمان.. عشان كده بيحاولوا يملوا شققهم بحاجات قديمة لمجرد إنهم يبصوا عليها بس».