سائق التاكسي "الأمين" لـ"الوطن": ضميري مماتش 1% لأطمع في الفلوس

10:57 م | الأربعاء 09 نوفمبر 2016

روى حسن سمير السيد الشيمي حسن، سائق التاكسي الذي أعاد مبلغا ماليا 66 ألف جنيه لمالكه بعد أن تركه سهوا في التاكسي الذي يعمل عليه، تفاصيل الواقعة.

وقال حسن، في تصريحات خاصة لـ"الوطن": "ركب معي شخص نزلته في موقف النجيلة بمدينة مرسى مطروح، وأول لما مشيت بالتاكسي ومجرد لما وصلت عند سوق ليبيا عيني جت على كيس أصفر فوجئت بيه فركنت السيارة وأول لما شوفته لقيته مليان فلوس لكن الحمد لله ضميري مماتش 1% لأطمع في الفلوس، ورجعت الموقف ألحقه لم أعثر عليه وفضلت أدور حتى قمت بالإسراع فى الطريق المؤدى إلى مدينة النجيله كى ألمحه في سيارة ميكروباص لم أتمكن من ذلك".

وأضاف: "كنت فرحان أكتر من صاحب الفلوس إني رجعتها لأصحابها، وأؤمن أن من ترك شيئا لله عوضه خيرا منها، والحمد لله إن المال رجع لأصحابه ولو كان المبلغ أكبر من كده كنت هرجعه لأن الحمد لله الواحد عينه مليانة"، مستكملا: "أنني مقيم في مطروح منذ 3 سنوات واتجوزت قريب وكان نفسي أشتغل في تخصصي حاسبات ومعلومات وعشان مش لاقي شغل وقدمت في وظائف كتير ولم أجد اضطريت أشتغل سائق تاكسي عشان أقدر أفتح بيت وكل اللى أتمناه إنى أحصل على شقة من شقق الشباب أعيش فيها مع أسرتي أو أشتغل في أي وظيفة".