فقط فى «البحر الأعظم»: تسكن على النيل.. وتعانى من الزبالة

09:25 م | السبت 08 أكتوبر 2016

اختيارهم للسكن أمام شاطئ النيل، كان بهدف الاستمتاع بمشهد خلاب يضيف إلى حياتهم بهجة وجمالاً، فإذا بهم يخسرون هذا الحق، ويحاصرون بالأمراض والأوبئة. هكذا يحيا سكان شارع البحر الأعظم، التابع لحى جنوب الجيزة، بسبب انتشار القمامة وتغطيتها مساحة كبيرة من شاطئ النيل بجوار سور نادى الجيزة. {left_qoute_1}

«الحاجة الوحيدة اللى أقدر أقولها إن شاطئ النيل يحتضر، وإن مفيش حد قلبه على البلد ولا بيفكر فيها»، كلمات أحمد سعيد، الذى يطل بيته مباشرة على القمامة المتراكمة، معلناً أنه حاول كثيراً التواصل مع المسئولين من أجل حل المشكلة دون أى جدوى.

«رُحت لمكتب المحافظ، ومسئول الحى ونائبه، ومفيش حد عبّرنى، ولا فكر يبص فى الشكوى، وكل شوية يتحججوا إنهم مش فاضيين، كأننا مش مواطنين، ومن حقنا نعيش فى مجتمع نضيف»، حسب «سعيد».

أما فاطمة أحمد عبدالنبى، ربة منزل ومن سكان المنطقة، فأكدت أن الأوضاع المتردية تتفاقم فى المنطقة مع مرور الوقت: «فى البداية كنا بنقول شوية زبالة وبكرة حد هيشيلها، لكن الموضوع زاد لدرجة إنه غطى مساحة كبيرة من الميه، والمشكلة الأكبر فى الحشرات المختلفة اللى بقت تدخل بيوتنا وتهاجم عيالنا، وإحنا لا حول لنا ولا قوة، لدرجة أن بعض السكان اضطروا يركبوا حواجز معدنية على الشبابيك للحماية».

يترحم عزت عيد، موظف، على المنطقة التى كانت توصف بالسياحية من قبل، وصارت بهذا الحال المتدنى: «كانوا بيوصفوا منطقتنا إنها سياحية ومنبع الحضارة، دلوقت مفيش أى حاجة من الكلام ده. ولادنا الأمراض بتصيبهم واحد ورا التانى، ولأن النيل بدأ مستواه ينحسر، الزبالة بقت واضحة وغطت مساحة كبيرة منه نحو 5 متر، واللى يشوف المنظر ممكن ينخدع ومايعرفش إن الزبالة دى راقدة على ميه النيل.. فين بقى المسئولين اللى بيقولوا إحنا دايما بنتحرك علشانكم؟».

«بنحاول نحسّن الوضع على قد ما نقدر، وبنتحرك بمجرد تلقى شكاوى من الأهالى»، يقولها «موسى السيد»، مسئول فى غرفة عمليات هيئة النظافة والتجميل بمحافظة الجيزة، مؤكداً أن مشكلة القمامة ترجع لسببين، أولهما أنه مع انحسار مياه النيل، يقوم عدد كبير من المواطنين بالتعامل مع شاطئ النيل وكأنه مقلب قمامة وهو ما حدث بالفعل، أما السبب الثانى، فيتمثل فى اللجوء إلى جهات غير مختصة لحل الأزمة: «المحافظة غير مختصة بالأمر وهى مسئوليتنا، وسنعمل على حل الأمر قريباً».