أحد المحتجزين عن "كارثة الإيدز بالسجون": "مش فاكر نزلت أحلل مكان مين"

11:11 م | الثلاثاء 09 أغسطس 2016

قال وكيل نيابة الهرم، في الأوراق الرسمية التي كتبها عن التحقيق في "كارثة الإيدز بالسجون": "قُمنا بتنبيه الماثل خارج غرفة التحقيق، وتبين لنا وجود المدعو وليد نور الدين حنفى خارجها، فدعوناه ودخلها وبدأنا بسؤاله بالآتى إجابته:

اسمى: وليد نور الدين حنفى محمد، 14 سنة، وأعمل خراط، ومقيم بالطوابق شارع الشهيد أحمد حمدى فيصل الهرم، ولا أحمل تحقيق شخصية.

(حلف اليمين)

س: ما هو سبب وجودك بديوان قسم شرطة الأهرام؟

ج: أنا محبوس فى قضية سرقة.

س: وما هو الحجز الموجود به بالقسم؟

ج: حجز رقم سبعة.

س: وهل قمت بإجراء التحليلات الخاصة بمرض الإيدز؟

ج: أيوه، همّا قالوا لى انزل برقم ميه وخمسين (150)، بس ماعرفش اسم مين ومش فاكره بصراحة.

س: وما تفصيلات ما حدث؟

ج: اللى حصل أن أنا أثناء وجودى بالحجز رقم سبعة والسجان بتاع الحجز قال لى هتخرج علشان تحلل باسم واحد فى الكشف، ورقمه ميه وخمسين بس مش فاكر اسمه، وبعدين خرجت وقلت للجنة رقمى وعملوا لى التحليل، وبعدين رجعت الحجز تانى، وبعدين النهارده نادوا علينا وقالوا العشرة اللى عملوا تحليل إمبارح، ونزلت من الحجز علشان أتسئل قدام النيابة، بس محدش قال لى أقول حاجة بصراحة.

س: ومن الشخص الذى قرر لك أن يتم التحليل معك بذات الاسم والرقم أثناء إجرائك التحليل؟

ج: هو السجان، ومش عارف اسمه.

س: وما هو الرقم والاسم تحديداً؟

ج: هو رقم ميه وخمسين، بس مش فاكر الاسم إيه بصراحة.

س: وهل كان موجوداً آنذاك أحد الضباط بالقسم تفصيلاً؟

ج: هو كان فيه ضابط، بس مش عارف مين بصراحة.

س: وما هو قصد سالف الذكر تحديداً؟

ج: ماعرفش.

س: وما علاقتك بكلٍّ من «م. خ. أ. م»، و«ش. س. ع»، و«م. إ. ع»؟

ج: لا، ماعرفهمش.

س: وهل نما إلى علمك أن سالف الذكر مصابون بمرض الإيدز؟

ج: لا ماعرفش غير إمبارح بس.