سائقو موقف «المرج»: المواقف العشوائية «خربت بيوتنا»

09:30 م | الثلاثاء 05 يوليو 2016

لم يختلف موقف المرج الجديدة كثيراً عن غيره من المواقف التى قلت أعداد المترددين عليها، حيث كان إقبال المسافرين عليه ضعيفاً بشكل كبير، لا سيما فى خطوط مدن القناة من السويس والإسماعيلية وبورسعيد، بينما كان هناك إقبال متوسط على خطوط الصعيد، ومثلت المواقف العشوائية لموقف المرج أيضاً المشكلة الرئيسية التى يعانى منها السائقون والإدارة، كما شكا بعض الراكبين كذلك من ارتفاع سعر الأجرة فى الأعياد لا سيما فى خطوط الصعيد.

ويقول إبراهيم السيد حامد، المسئول عن خطوط مدن القناة بالموقف: «مدن القناة كلها شغلها بيبدأ بعد العيد، واحنا هنا بنخدم السويس والسخنة والزعفرانة ونويبع وشرم وبورسعيد وإسماعيلية وفايد والعريش» متابعاً: «أكبر المشاكل اللى بتقابلنا هنا المواقف العشوائية، واحنا هنا بنفذ أوامر وعشان نمنع المواقف العشوائية محتاجين مباحث المرور ومحتاجين جهة سيادية تمشى الناس دى، بس حتى يوم ما بينزل مباحث مرور بييجوا ياخدونا احنا ويسيبوا الناس ديه زى ما هى».

{long_qoute_1}

وأضاف: «إحنا هنا اللى بنخدم الراكب واحنا اللى شايلين الطين والمواقف العشوائية هى اللى شغالة ومحدش بييجى جنبهم، يعنى فى الوقت اللى أى خط جوه الموقف يطلع 10 عربيات كل يوم بتلاقى موقف البلطجية بيطلع 100 عربية، وبعدين إحنا الدخل اللى بندخله من الموقف ده بيروح لمين غير الدولة، فمفروض بقى الدولة تساندنا وأى جهة سيادية تقف معانا»، واستدرك: «واحنا هنا الراكب بياخد حقه تالت ومتلت كأن السواق شغال عنده، ولو حصل أى مشكلة بين سواق وراكب بنعمل للسواق مذكرة وبيتوقف لو كان غلطان».

وقال أشرف أبوسريع، سائق على خط القاهرة - نويبع: «زحمة العيد فى الخطوط دى كلها بتبدأ بعد العيد لأن أغلبية الناس اللى فى القناة من أهل الصعيد، فالزحمة بتكون بعد العيد وهمه راجعين شغلهم»، متابعاً: «مفيش أى مشاكل فى الموقف هنا والإدارة بتحاول تدى لكل واحد حقه».

وأضاف مصطفى محمود، سائق على خط القاهرة - بورسعيد، «أنا فى الموقف هنا من سنين، والشغل فى العيد هنا زى الأيام العادية والأجرة هيا هيا»، واستدرك: «إحنا هنا بنقعد باليومين عقبال ما بنطلع من الموقف بفردة واحدة وكمان لما بنروح هناك بنرجع فاضيين عشان مانعين عربيات القاهرة تحمل من هناك».

وتابع: «المواقف العشوائية هى اللى خاربة بيوتنا وبقت مالية الدنيا سواء فى رمسيس أو قدام محطة مترو المرج هنا، واتكلمنا مع إدارة الموقف بس برضه مفيش فايدة لأن هما بياكلوا منهم، وبيمشوا معاهم الشغل وبيستفادوا منهم، يعنى مثلاً لما يروح عند المترو يلاقى عربية بتحمل ما بيعملش حاجة غير إنه بياخد منه اللى فيه النصيب ويسيبه يحمل عادى»، وأكمل قائلاً: «حقنا هنا مهدور لأننا بنحمل من القاهرة والمحافظة فى بورسعيد مطلعة قرار بكده، إن العربيات اللى ترخيصها من القاهرة ما تحملش من هناك إنما تحمل من هنا بس وهى رايحة ونرجع فاضيين إحنا والكراسى بس، ولو حمّلنا من هناك بندفع 120 جنيه كارتة بلطجة بدل الكارته الرسمية اللى هى 30 أو 20 جنيه، ده غير إن الإدارة عندنا ظلمتنا لأنها إدت ميكروباصات بورسعيد جواب بخط سير بورسعيد المرج».

كما قال سامح رضا، المسئول عن خط الصعيد فى الموقف، «إحنا عندنا هنا كل خطوط الصعيد من أول بنى سويف لحد أسوان، والطبيعى إن فى أيام المواسم بيبقى عندنا ضغط ركاب، خاصة فى آخر 5 أيام فى رمضان، بس السنادى الشغل ضعيف شوية، وما فيش شك إن المواقف العشوائية لما كترت أثرت علينا سواء على دخل وإيراد الموقف أو على السواق اللى بيقعد بالتلات وأربع أيام عقبال ما يحمل دور واحد، بس برضه انت تحس إن ما بقاش فيه إقبال من الناس نفسها على السفر».

وتابع: «أكبر مشكلة بقت تأثر على المواقف العامة كلها بقى مكاتب الرحلات اللى بقت تاخد تصاريح تخليها موجودة داخل المواقف، وبالرغم إن هو أصلاً ما لوش حق إنه يحمل راكب بأجر بس هما بيعملوا كده».

ومن جانبه قال علاء ناصر، سائق على خط المرج - سوهاج، «إحنا عايزين نروح نعيّد مع عيالنا ومش عارفين، أنا بقالى هنا 4 أيام وده الخامس ولسه دورى فى التحميل ماجاش، مكتب الرحلات والمواقف العشوائية خربت بيتنا»، واستدرك قائلاً: «أنا لو أعرف أشتغل شغلانة تانية كنت رحت اشتغلت إنما أنا معرفش غير السواقة»، وتابع «ناصر»: «فى الأيام العادية ممكن نقعد أسبوع عقبال ما نحمل دور واحد إنما فى المواسم اللى زى كده ممكن نقعد يومين تلاتة».

ومن ناحية أخرى قال خلف مكين، الراكب الثلاثينى الذى جلس بجوار زوجته فى إحدى سيارات سوهاج: «أنا شغال فى القاهرة وبسافر من هنا كل عيد لسوهاج وساعات الموقف يكون زحمة وساعات تانية لأ، على حسب، بس السنادى مفيش زحمة كتير والعربيات موجودة»، وأضاف: «الأجرة فى العيد دايماً بتزيد وممكن توصل للضعف، يعنى أنا كنت بركب بـ70 جنيه دلوقتى بيقولوا إن الأجرة 90 جنيه، ومفيش رقابة على الكلام ده، يعنى دلوقتى مسافر أنا وأسرتى واحنا 3 أفراد يعنى هدفع حوالى 100 جنيه زيادة».