تسمم طفل لتناوله عيش إيطالي به براز فأر بالإسكندرية.. والأم: "التموين لا حس ولا خبر"

11:54 ص | الأربعاء 10 فبراير 2016

لم تكن تعلم "أم ياسين" وهي تحضر العشاء لأولادها وزوجها، أن العيش الإيطالي الذي تضع فيه الجبنة مسموم ويحتوي على براز فأر، لتفاجئ بعد تناول نجلها الصغيير 8 سنوات، بآلام حادة في معدته بعد تناول رغيف عيش.

وتوجت الأم سريعا لقسم السموم بمستشفى الأميري الجامعي، ليفاجئوا بحالة تسمم حاد لنجلها بسبب تناوله الطعام، وتكتشف بعد ذهابها إلى المنزل أن العيش به براز فأر، وتحرر محضر بقسم شرطة الدخيلة غرب الإسكندرية، يحمل رقم 3185 ضد صاحب المخبز الإيطالي.

وتقول "أم ياسين": "احنا ناس غلابة على قد حالنا جوزي بيشتغل باليومية، ومش دايما بناكل العيش الفينو الغالي علشان المصروف بيكون على قد الحال، واحنا عارفين أن الفرن ده من أكبر الأفران الموجودة بالعجمي، وكل الناس بتشتري منه لأولادها، وكان نفس العيال في العيش الفينو، ولا حد فينا أخد باله أن العيش فيه براز فار".

وتضيف: "مكنتش أتوقع أن الناس معندهاش ضمير للدرجة دية، ابني لحد دلوقتى تعبان وبياخد أدوية، ويتابع مع المستشفى لسه معدته بتوجعه، كان ممكن يروح فيها، حسبنا الله ونعم الوكيل، احنا حررنا محضر بقسم الشرطة ضد صاحب الفرن الإيطالي، والعيش متحرز مع المحضر في النيابة، وادينا مستنين القانون يجيب حق الغلابه".

وتابع: "صاحب الفرن أول ما عرف اننا عملنا محضر على طول جمع كل المخبوزات اللي فرن، علشان كلها غير صالحة، للأسف الناس لسه بتشتري ومش عارفه حاجة، والتموين لا حس ولا خبر ولا في لجنة تفتيش تنزل تشوف المخابز الإيطالي اللي في العجمي، وتشوف الدقيق اللي بيتباع للمواطنين، إحنا خايفين من صاحب المخبز علشان بيحاول يضغط علينا علشان نسحب المحضر من النيابة، وحقي وحق ولادي حيروح".

وطالبت وزير التموين أنه يشن حملات تفتيشه على مخابز الأفران الإيطالية، التي تبيع للمواطنين السم وعيش غير صالح للاستهلاك، دون رقابة من الدولة، مؤكدة على أنها تركت منزلها خوفًا من صاحب الفرن ولمتابعة علاج ابنها في المستشفى.