كل حاجة ليها خط ساخن.. حتى الشجرة

11:52 م | السبت 05 ديسمبر 2015

شوارع على جانبيها أشجار ضخمة متهالكة، يسقط منها على فترات شجرة تؤدى إلى تدمير السيارات المركونة بالشارع، عدة شكاوى قدّمها أهالى المعادى إلى المسئولين، لإيجاد حل فى أشجار شوارع المنطقة التى تتساقط يوماً بعد آخر، وتسبب خسائر باهظة فى سيارات الأهالى.

بعد مرور 5 أشهر على الأزمة، أعلن جهاز حى المعادى عن رقم خط ساخن «7755»، لتلقى الشكاوى من الأشجار المتهالكة، مما دفع أنور أحمد، أحد أهالى المعادى منذ 30 عاماً، إلى تجربة الاتصال على الرقم، متعجباً من هذا الحل، فالخطوط الساخنة اعتاد أن تكون مشغولة دوماً أو لا تجيب فى أصعب الأزمات: «يعنى هو الخط الساخن بينقذ الناس من الميّه والكهرباء والأنبوبة عشان تقف على الشجرة، إحنا فعلاً بنعانى من الأشجار القديمة اللى عندنا فى المنطقة، بس مش لدرجة إنى أخصص ليها رقم ساخن».

جرب «أنور» الاتصال بخط الشجرة، فوجد استجابة سريعة: «قلت لهم عندنا شجرة ضخمة جداً هتقع على الناس، وهتسبب مشكلة كبيرة، لقيتهم استجابوا وراحوا شالوها، يا ريت الخطوط كلها تبقى زى كده».

سالى كمال، واحدة ممن سقط على سيارتها شجرة متهالكة بشارعها 205، فحاولت الاتصال بالخط الساخن للإبلاغ عن الأشجار بالمعادى، ليأتيها الرد: «قولى عنوان الشجرة وسيبى لينا رقم حضرتك عشان نبلغك إننا شيلناها»، الاستجابة السريعة أبهرت السيدة الأربعينية، وتتمناها فى الخطوط الساخنة الأخرى المرتبطة ببلاغات مصيرية: «عربيتى وقعت عليها شجرة كبيرة من أسبوعين ودمرت معاها أكتر من 6 عربيات، حاجة إيجابية أن الجهاز يهتم بمشكلة زى دى، بس الأهم يبقى فى كله، مش أكلم خط ساخن عشان أبلغ عن شجرة يردوا، وأيام أزمة الأنابيب محدش يرد».