«الحاجة بدر» تكسب 100 ألف جنيه صدفة: «كنت رايحة أزور ابنى المريض»
«الحاجة بدر» تكسب 100 ألف جنيه صدفة: «كنت رايحة أزور ابنى المريض»
جاءت من إحدى قرى محافظة الدقهلية إلى القاهرة، حاملة شنطة كبيرة مليئة بالأكل، لتزور ابنها المريض فى أحد مستشفيات القاهرة، لتتفاجأ بمحمد رمضان داخل محطة القطار، يستوقفها ويسألها «جاية منين يا أمى؟»، لترد قائلة: «كنت بازور ابنى المريض، باعالجه بقالى 9 سنين، وباجرى عليهم وحدى»، ليرد: «مبروك يا أمى كسبتى 100 ألف جنيه»، لتقف فى ذهول وتجد نفسها تطلق الزغاريد وتقول «بالصلاة على النبى»، لتتفاجأ مرة أخرى أنه وضع صوتها كنغمة على تليفونه.
فائزة في برنامج مدفع رمضان
هذا ما حدث للحاجة بدر، التى أسعدها الحظ بمقابلة محمد رمضان لتكون واحدة من الفائزين بجوائز برنامجه، تحكى عن ذلك اليوم الذى لن تنساه: «ماكنتش مصدقة أبداً، أنا كنت رايحة زيارة لابنى المريض، وفجأة لقيت حد بيزق الناس وسط الزحمة وجاى يكلمنى، وبعدها قبّل راسى وأعطانى 100 ألف جنيه. ماقدرتش أرد، لقيت نفسى باعيط وبازغرد فى نفس الوقت، والناس كلها اتلمت حواليا، لكنى أيقنت أن ربنا بيطبطب على قلبى، علشان كنت وقتها باقول يا رب أنت عالم بحالى، وقادر تفرجها علينا».
مدفع رمضان يرسم افلرحة على وجه بدر
لم تتخيل الحاجة بدر أن يضع محمد رمضان صوتها كنغمة على هاتفه: «تانى يوم لقيت نفسى على التليفزيون وزغرودتى وصوتى وصلاتى على النبى ظاهرة، والناس كلها كلمتنى، ففرحت ودعيت له، السنة دى عمل حالة حلوة وجبر بخاطر الناس اللى مالهمش غير ربنا، علشان كده بنشكره وبنقول له شكراً يا ابن الناس، تحسيه فنان ومعاه فلوس كتير، لكنه متواضع وطيب وحنين، نفسى أشوفه تانى فى الدقهلية عندنا علشان أبوس راسه».
وذكرت تفاصيل لقائها مع محمد رمضان في برنامج مدفع رمضان، قائلة: «كنت ماشية وباقول يا رب أنت اللى حطتنى فى المحنة وبإيدك تخليها منحة، وفجأة لقيته بيقول لى أنا مجرد سبب، ودى هدية منى ليكى علشان بتصرفى على ابنك الوحيد، فرديت بزغرودة ورقصة، وقلت بالصلاة على النبى، فرد جمع المسافرين بالصلاة على النبى، ولقيته بيرقص معايا وبيحفّز الناس كلها، ومادريتش بنفسى إلا وأنا باقول كرمك يا رب، والكلمة دى ملازمانى فى حياتى لما باشوف أى حاجة حلوة باصلى على النبى، وهى الكلمة اللى بتخرجنى من كل أزمة، وبتكون سبب فك كربى».
