أهالى الضحايا لـ"محلب": "فلوس الدنيا مش هتعوّضنا عن عيالنا"

انتقد أهالى ضحايا حادث «الوراق» قرار المهندس إبراهيم محلب بإقالة رئيس المسطحات المائية ومدير النقل النهرى إثر الحادث الأليم الذى توفى على إثره نحو 40 شخصاً، وطالبوا بمحاسبة المسئولين وليس إقالتهم فقط، وقالوا إن تعويضات الحكومة لن تُشفى غليلهم، واتهموا الحكومة بأنها تتعامل معهم على أنهم ليس لهم قيمة، ويساوون بضعة جنيهات فقط ولا تحمى أرواحهم فى البر والبحر. وعلق محمد يوسف، شقيق تامر على يوسف، الذى توفى اثنان من أبنائه وزوجته وحماته وشقيقة زوجته فى حادث غرق مركب الوراق، على قرارات محلب، قائلاً: «الإقالة هتعمل إيه، والتعويضات هتعمل إيه، هترجّع العيال اللى ماتت تانى؟، ولو أخدنا 60 ألف جنيه، أو 60 مليون جنيه العيال اللى ماتت هترجع تانى، الحادثة دى مش أول حادثة ولا هتكون آخر حادثة، لأن الإهمال الحكومى مستمر، ولن يتوقف بقرار إقالة أو تعويض، كل القرارات دى مش هتفرق معانا، إحنا اللى فى النار». وأضاف يوسف: «يعنى إيه مسئول اتشال من منصبه بعد الحادثة، هيطلع معاش وهياخد مكافأة نهاية الخدمة، وهيرجع يقعد مع عياله، لكن إحنا اللى أسرتنا اتشردت وبيتنا اتخرب، دفنا 5 ولسة بندوّر على طفل صغير عشان ندفنه، مش بندوّر على تعويضات، مفيش فلوس فى الدنيا تقدر تعوّضنا عن لحمنا». وأوضح يوسف أن الإنقاذ النهرى بطىء جداً وأن الصيادين البسطاء هم الذين انتشلوا الجثث من الماء، مشيراً إلى عدم رضائهم عن أى قرار تصدره الحكومة مهما كان لأنه لن يعوضهم عن أبنائهم وفلذات أكبادهم الذين ماتوا نتيجة إهمال الحكومة، لأنها سمحت بسير الصندل ليلاً، وبشكل مخالف دون رقابة حقيقية من شرطة المسطحات، مفيش أى حاجة هتشفى غليلنا لأن أرخص حاجة فى مصر الآن حياة البنى آدمين، لو فيه مسئول من المسئولين ابنه مات، هيكفيه 60 ألف أو حتى 60 مليون؟». وقال وائل كامل، شقيق كمال كامل، الذى فقد 7 من أسرته فى الحادث: «مش عاوزين فلوس، هى الفلوس هترجّع لنا اللى راح، إحنا عاوزين محاسبة حقيقية للمسئولين اللى تسببوا فى الإهمال، الذى أدى لموت أكثر من 40 شخص، طلّعنا 40 جثة ولسة فيه ناس فى الميه لحد دلوقتى، ولادنا قعدوا 3 أيام فى الميه لحد ما اتحللوا وطلع ليهم ريحة، وكيل النيابة جه يعاين فى المشرحة كان لابس كمامة ومكنش طايق الريحة، وإحنا قاعدين جنب الجثث فى المستشفى وقلبنا محروق عشان ناخد تصريح الدفن، لو هيدّونا فلوس الدنيا كلها مش هتعوضنا عن عيالنا، هو تربية العيال دى بالساهل، القرار اللى طلع ده بيبين أن البنى آدم رخيص أوى عند الحكومة، الإقالة لن تشفى غليلنا، إحنا عاوزينهم يتحاسبوا عن دم عيالنا اللى هيروح هدر، أنا أطلب محاسبة رئيس هيئة المسطحات المائية الذى أقاله محلب بعد الحادث لأنه قصّر فى عمله». وأضاف وائل: «بعد سماعنا خبر غرق المركب توجهنا إلى قسم شرطة الوراق الذى يقع بجوار المرسى، فرد علينا ضابط الشرطة، هو إحنا بحر، هنا القسم روح البحر دوّر على اللى غرق ومات، ومفيش حاجة تطفّى نارنا، غير حبس المسئولين وحسبى الله ونعم الوكيل فى اللى كان السبب، لو اللى مات فى الحادثة أجانب كانت الدنيا اتقلبت، إنما المواطن المصرى مالوش لازمة فى بلده، الإنقاذ اتأخر، ولم تكن أى جهة على قدر المسئولية، وفى الآخر محلب طلع وأقال اتنين وصرف 60 ألف لكل واحد مات.. يا بلاش».