حكاية "أكلة سمك" طردت إبراهيم سعيد من معسكر المنتخب: الجوهري كسرالفندق

سرد الكابتن إبراهيم سعيد، لاعب منتخب مصر السابق، موقف كوميدي في أحد المعسكرات أثناء تولي الكابتن الراحل محمود الجوهري، مسؤولية تدريب منتخب مصر، قائلًا: "أنا كنت بعمل مصايب سوده والله، وهحكي موقف لا أنساه بصراحة". وأضاف سعيد، في تغريدة عبر صفحته الشخصية على "تويتر": "الله يرحمه كابتن محمود الجوهري كان عامل معسكر في فندق 15 يوما، وكان رافض الوجبات في الغرف حظي الحلو الغرفة اللي جنبي عريس وعروسة جدد، وفجأة آه والله بجد، لقيت الباب بيخبط، قمت أشوف مين". وتابع "لقيت الروم سيرفيس واقف وجنبه عربية عليها فاكهة وسمك وجمبري وشوربة، حاجة ولا في الخيال، قولتله تحت أمرك وبيدخل الأكل في الأوضة، قالي مش حضرتك العريس قولتله آه، قالي ألف مبروك، قمت مكلم اللاعيبه من غير أسامي قولتلهم عزمكم على أكلة سمك ومحدش اتردد بصراحة". وواصل: "كله أكل وراح غرفته بعديها بساعتين جالي نفس الشخص قالي الأكل جه غلط، قولتله يا راجل، وقالي العريس عامل مشكلة في الفندق فممكن الأكل، هو خد الأطباق بس والأكل بح، والفندق اتقلب والعريس والعروسة نزلوا الريسيبشن، كان يوم طين، وراحوا اشتكوا كابتن جوهري". وأكمل: "عرفت أن كابتن جوهري طالعلي الأوضة، قفلت على نفسي بالمفتاح وطالع بقى متعصب ويخبط عليا وأنا مش عايز أفتح الباب، قام كاسر الباب برجله، قمت داخل الحمام وقافل على نفسي ويخبط ومش بفتح، قالي يا بني ارحمني الفندق كده هيتكسر، قالي طيب خد شنطتك وامشي من المعسكر قولتله كل ده عشان أكلة سمك". واستطرد: "المهم مشيت وتاني يوم صالحونا على بعض، وهو كان طيب بصراحة.. الله يرحمه ويغفر له، وتاني يوم قفشني وأنا بشيش كنت أنا وميدو وأحمد صلاح حسني".