"وجوه في الغربة".. "معتز" من إيطاليا: "مفتقد رمضان مصر ولمتي مع عيلتي"

سحر الطبيعة الخلابة في إيطاليا وجمالها، لم يغنيه عن افتقاد روح شهر رمضان في مصر، غيابه عنها لمدة 7 شهور، بسبب إعداده مشروع تصوير تابع لإحدى الجمعيات في القاهرة، ومن المفترض أنه يستغرق 9 أشهر، هذا ما يجعله مفتقدًا لأجواء رمضان، يتمنى معتز محمد أن تنتهي مدة مشروعه للعودة لمصر. يفتقد "معتز" أجواء رمضان في ميلانو التي يقطن بها الآن، إضافة لوجود صعوبات في الصيام، "رغم أن في مسلمين كتير، بس مفيش إحساس برمضان، المساجد هنا قليلة بس كبيرة، والنهار طويل والجو حار"، موضحًا سبب شعوره بالجو الحار، بقوله: "لإني كنت عايش في منطقة بالقرب من جبال الألب في فترة الشتاء، ودرجة الحرارة لما توصل لـ35 بتبقى حر جدًا، لأن الجسم مش متعود، وعندي أزمة في العطش، لأن عدد ساعات الصيام 18 ساعة". يحاول "معتز" مع أصدقائه خلق جو رمضاني بقدر الإمكان، "بطبخ أنا وأصحابي، اللي بيعرف يطبخ حاجة بيعملها، دايمًا بنعمل أكلات سهلة زي الأرز والبامية والبسلة والملوخية والفراخ واللحمة، والسحور بيكون بيض وجبنة وفول، وبنصلي التراويح"، ورغم أنه قضى 7 أشهر في إيطاليا، إلا أنه لم يتعود على الأطعمة الإيطالية، "لفيت كتير في الفترة الي قعدت فيها تقريبًا 4000 كيلو في إيطاليا، إلا إني محبتش أكلهم باستثناء البيتزا والباستا، وكل ما اتنقل لمكان بدور على مطاعم مصرية، لإن مبيعجبنيش أكلهم". صعوبات يواجهها الشاب العشريني إلا أنه يرى "تجربة سفري لإيطاليا أفادتني وعرفتني حاجات كتيرة، لو مسافرتش كنت هحتاج سنين علشان أعرفها"، قائلًا: "ضمن مشروعات التصوير اللي قمت بيها مشروع عن رجل إيطالي، عشت معه 3 شهور، ساعدني ذلك على التعرف على العادات والتقاليد الإيطالية". لو تكررت تجربة "معتز" وهي تنفيذ مشروعات تصوير في دول أخرى، يتمنى أن تكون بعيدة عن شهر رمضان، يقول بنبرة يغلب عليها الحزن: "لو جاتلي التجربة دي تاني هبعدها تمامًا عن شهر رمضان، لإني مفتقد الأسرة ورمضان مصر، ودي أول مرة أقضيه بره مصر"، عادات وتقاليد الشعب الإيطالي بالنسبة لـ"معتز" لم تكن محببة، "أنا مشفتش عادات وتقاليد كويسة منهم بصراحة، بس في اختلاف بين أهل الجنوب والشمال، الجنوب شبهنا بيتميزوا بالكرم، لكن أهل الشمال محبتهمش لإنهم بخلا وعندهم قلة ذوق". "عامة في إيطاليا كلهم عايشين علشان يتبسطوا وبس، مقابلتش حد عنده طموح، لكن أهل الشمال بيحبوا الشغل وبيلتزموا بالمواعيد"، هكذا يصف معتز الإيطاليين، لافتًا إلى أن الشباب الإيطالي يعاني نفس معاناة الشاب المصري، "قابلت أصحاب هنا عندهم طموح إنهم يخرجوا بره إيطاليا زي شباب مصر، مش حابين يقعدوا في البلد هنا".