كراسى وتحف فنية من إطارات السيارات
كراسى وتحف فنية من إطارات السيارات
من منطلق «الحاجة أُم الاختراع»؛ قررت سارة شاكر، مصممة إكسسوارات المنازل، ووالدتها، جمع المخلفات البيئية المحيطة بهما، وإعادتها للحياة مرة أخرى، باستخدام إطارات السيارات «الكاوتش» حين أبدعتا فى استخدامها على شكل «كرسى وطاولة ومقعد». «سارة» تعشق استخدام الألوان المبهجة وتحرص على مزجها مع الأشياء القديمة لبث الروح فيها، ومن هنا كانت نقطة الانطلاق، فقامت الشابة العشرينية بجمع الكتب القديمة وتلوينها، لعمل «أباجورات» مضيئة: «باحاول أربط بين الهدف والوسيلة، يعنى الكتب أو القراءة بشكل عام بتنور طريقنا، ومن هنا جاتلى فكرة أباجورة من كتاب». لم تكتفِ «سارة» باستخدام «الكاوتش» والكتب، بل قامت بجمع الأخشاب وقطع الزجاج لعمل أشكال فنية: «باشتغل مع ماما وكمان جوزى وإخواتى بيساعدونا، وأى مشكلة تواجهنى هما بيكونوا فى ظهرى، ومؤمنين بالفن اللى باقدّمه».
الإقبال الشديد على شراء مقاعد «كاوتش» لم تتخيله الشابة العشرينية، خاصة أنها تؤمن بأن المجتمع لا يتقبل كل جديد وكثيراً ما يلفظه، لكنها فوجئت بحرص البعض على إعطائها الإطارات مقابل إعادة تدويرها بالألوان والأشكال: «فيه ناس بتيجى تختار شكل معين مش عندى، زى زهرية للحدائق بتاعتهم، وبنتفق على الشكل وكل التفاصيل». عدم امتلاك «سارة» مكاناً لعرض منتجاتها، دفعها لاستخدام منزلها الخاص لتصنيع وعرض منتجاتها، بالإضافة إلى محاولاتها للاشتراك فى المعارض، فتقول: «قريباً هيكون عندى جاليرى بتاعى، والناس تيجى تتعلم إزاى تستخدم كل حاجتها اللى باظت وترجعها للحياة من جديد».
