م الآخر| خناقة الحريم فى شم النسيم!

يااااااااااااه أخيرا الواحد وصل البيت .. يا ساتر كان يوم شاق جدا .. أنا قلت لهم من الأول مابحبش أخرج يوم شم النسيم ولا بحتفل به الشوارع كلها بتبقى ريحتها رنجة وفسيخ وبيض قعد توتى يقول لى لا احنا هناكل سمك وجمبرى وهنتفسح فسحة حلوة وهيبقى معانا إخواتى وولاد عماتى وأهى العيال تشم هوا .. هوا إيه بس يا توتى .. وطبعا العيال شبطت واضطريت اجهز شوية تسالى من بالليل .. بينى وبينكم اكتر حاجة عجبتنى فى الرحلة دى إن إحنا علينا الحاجات الساقعة بس واللب والتسالى. وتانى يوم الصبح أخدنا ميكروباص كبير اتجمعنا فيه انا وتوتى والعيال واخوات توتى ومراتتهم وفى الميكروباص دار الحوار التالى بين اخو توتى ومراته .. هى بنت عمك جايه الجنينة .. ايوه .. اوف انا مش ناقصة خنقة .. وهى هتخنقك فى إيه بس .. ما انت عارفها تقيلة على قلبى ولا انت ناسى .. ان كان على موضوع ارتباطى بها فده زمان وعدى .. اه عدى اوى وهى كل ما تشوفنى تقول لك الله يكون فى عونك .. عادى يعنى .. قمت اتدخلت انا : كبرى دماغك يا صافى ولا يهمك ان ماكانش بيحبك ماكنش اتجوزك .. قولى لها والنبى يا كوكى. ودخلنا الجنينة والتقت الأسر وبعد السلامات والترحيبات ابتدت صافى تنفخ ومش طايقة نفسها وانا حاولت اهدى الموقف بس بصراحة نهاد بنت عمهم كانت رخمة اوى ومزوداها وعمالة تتدلع على سمير اخو جوزى بشكل مستفز وخلتنا جهزنا الأكل من هنا وراحت قايلة له بتهيألى كفاية عليك صافى لحد كده انت المفروض تغيرها وتتجوز واحدة تانية تجدد شبابك بدل شعرك اللى ابيض ده قامت ردت اختها وهى بتضحك وقالت : ده ابيض من اللى بيشوفه خمس عيال وأمهم حرام . وفجأة لاقيت صافى ضربت كرسى فى الكلوب ومسكت سمكايه بورى حلوة كده كانت طالعة من عينى ورمتها على نهاد واشتغلت ردح عالمى بصراحة انا اتخضيت فى الأول بس استجمعت قوايا وقلت لهم مايصحش كده يا جماعة صلوا على النبى وإهدوا شويه بس لاقيت نهاد ابتدت تضرب فى صافى وحاولت احوش عنها ماعرفتش وطبعا توتى واخوه بيحاولوا يهدوا العيال اللى اتخضت لحد ما الجنينة اتلمت علينا قلت مابدهاش انا جعانة انا والعيال وتوتى والاكل ممكن يتداس فى الرجلين بصراحة استحرمت واخدت الاكل وندهت على توتى اللى كان مش راضى ييجى وعمال يقول لى هاسيب اخويه كده .. حبيبى اخوك مبسوط ان فى اتنين ستات بيتخانقو علشانه. على رأيك هاتى شوية جمبرى من عندك .. امممممم دوق الكابوريا تحفة .. كلوا يا ولاد كلوا .. وبعدها بحوالى ساعة واحنا بنشرب الشاى لاقينا صافى ونهاد داخلين علينا يضحكوا .. فين يا كوكى الأكل احنا جعنا اوى .. ايه ده انتو مش كنتو بتتخانقو .. لا ما احنا اتصالحنا خلاص .. توتى : عجبك كده هنتصرف ازاى دلوقتى .. انا : استنى بس اصبر أنا هظبط الموضوع .. وقلت لهم : اهو كده يا جماعة الموضوع اتفه من كده ، ايه يعنى سمير كان بيحب نهاد ده كان زمان ودلوقتى خلاص نسى كل حاجة وبيقول عليها انها واحدة اى كلام واخدت منه الشبكة رغم انها هى اللى فسخت الخطوبة. وخلاص دلوأتى بقى يحب صافى اينعم هو متضايق من تخنها ودايما يشتكى ويقول مربى فيل معايه فى البيت بس فى الاخر الست مالهاش غير جوزها .. صافى : ايه على بيقول على فيل .. نهاد : وبيقول انى اخدت الشبكة ده هو اللى باعها واحنا مخطوبين .. طيييييييب .. اجرى بسرعة يا توتى ، يالا قوموا يا ولاد .. اخويه بيتضرب .. يا عم كبر دماغك خلينا ننفد بجلدنا!