بالصور| "ليلى" بائعة الفاكهة "بتسترزق" من عرايس المولد": "عشان العيال"

من أجل تعليم أبنائها الستة، تكافح "ليلي"، تسهر، وتعمل في أكثر من مهنة.. تجلس لتبيع الفاكهة بالفجالة، تحاول التعرف على التجار، تتعلم حركة البيع والشراء، تسهر الليالي.. أحيانا تنام وهي جالسة على "فرشة الفاكهة"، ومع قرب المولد النبوي، قررت بيع بعض عرائس المولد. يمر أحد الزبائن أمام العرائس، ويسأل عن "صاحب الفرشة"، يهرول من بالشارع مناديا على "ليلى"، النائمة من شدة التعب. "كلنا هنا صحاب، وعشرة وجيران، سواء الستات والتجار، وبنساعد بعض، اصل إحنا بنعد هنا أكتر ما بنكون في بيوتنا عشان أكل العيش".. قالتها السيدة الخمسينية، مؤكدة أنها تذهب يوميا من مسكنها بالنهضة، إلى الفجالة، تجلس من العاشرة صباحا، حتى الواحدة ليلا، واحيانا تنام أمام "فرشها" من شدة التعب. "أهم حاجة أعلم عيالي بالحلال بعد وفاة أبوهم.. أنا جوزت البنتين، والأربعة الأولاد في دبلوم ومدارس، لازم ياخدوا شهادة، ومش عايزاهم يتعبوا زي حالاتي".. قالتها، مؤكدة أن وجودها بالفجالة أكسبها خبرة كبيرة في الحياة، فاختلطت بزبائن من جميع المستويات، وتعرضت لمواقف علمتها الكثير. "اشتغلت كل حاجة، بعت كشاكيل، فاكهة، كتب، مجلات، والحاجات الموسمية زي الفوانيس وعرايس المولد، اللي بيربي أسرة لازم يكافح".. تؤكد أن حركة بيع "عرايس المولد" جيدة هذا العام، وتتراوح الأسعار ما بين 35 و140 جنيه". تستطرد "فيه حاجات شعبية، وفيه حاجات وتقاليع جديدة، زي العروسة على الكوشة بـ140 جنيه، والكارتة عليها العروسة والعريس بـ70 جنيه، وأهو كلها أسباب ورزق حلال من عند ربنا الحمد لله، عشان خاطر العيال، إحنا ناكل عيش والناس تنبسط"، مشيرة إلى أنها تعلم أبناءها الكفاح والصبر، والبحث عن الرزق الحلال، والأمانة، فهي حريصة على نقل خبرات حياتها لهم، كما حرصت على تعليمهم في المدارس.