أنا ليّا مدير
بصراحة أنا ليّا مدير
أستاذ خصم وتكدير
ودى حاجات ناجح أوى فيها
وجايب فيها كمان تقدير
أنا مديرى كيفه يوماتى
ينغص عليّا حياتى
ويخترعلى ف أى حاجة
يزود بيها مهماتى
ف أمرى بحسه بيفكر ومحتار
ف إيه يطحنى طول النهار
بحس ساعات إنه ناقص يقولى
انزل بعد الشغل اشتريلى الخضار
ف نظره دايماً أنا ف شغلى مقصر
ويا سلام لو مرة جيتله متأخر
يفرج عليّا كل اللى ف الشغل
ويبتدى لسانه ينقط ف سكر
فاكر الإدارة إنه بس يعلق
ويعلى صوته ويأمر ويتخلق
فاكر إنه بكده يبقى مدير
وإنه لقواعد الإدارة بيطبق
ماافتكرش عملها مرة بصراحة
إنى غلطت ف حاجة وفهمنى براحه
كل مرة يدينى الطريحة التمام
ويقولى فاصل ونكمل بعد الاستراحة
أنا ليّا مدير متأكد لو شافنى
بضّرب ف الشارع أو حد خاطفنى
هيعمل نفسه مش شايف وهيكمل
ف طريقه عادى ولا كأنه يعرفنى.