«الحلاق المجنون».. يغسل شعر الزبائن بصابون «مواعين» وينظف البشرة بفوار
«الحلاق المجنون».. يغسل شعر الزبائن بصابون «مواعين» وينظف البشرة بفوار
في صالون صغير بأحد الأحياء الشعبية، يعمل عبدالله قطب، الملقب بـ«الحلاق المجنون»، الذي أطلقه زبائنه عليه، بسبب أنه يبتكر وصفات يستخدم فيها مكونات عادية جدا، لكن لا يخطر على بال أحد، أنها مفيدة للشعر والبشرة، كما يفعل مع زبائنه، ساعيا من وراء ذلك، إلى منح الجميع فرصة العناية ببشرتهم وشعرهم بأرخص وأوفر الوسائل.
من أغرب الأشياء التي يستعملها «الحلاق المجنون» مع زبائنه، بحسب ما يحكي في بث مباشر لـ«الوطن»، صابون غسيل الأطباق: «بحب أغسل الشعر بصابون المواعين عشان بيشيل أي نسبة كريم أو دهون في الشعر، وبيساعدني في شغلي في البروتين والفرد والاستشوار وكل حاجة».
غسيل الشعر بـ«صابون مواعين»
غسيل الشعر بصابون الصحون السائل مفيد جدا من وجه نظر «عبدالله»: «مفيد لنضافة الشعر والقشرة، لكن مش باستعمله كل يوم، بستعمله فقط قبل الفرد أو البروتين أو الاستشوار عشان الشخص ميحسش بأي لسعة في الشعراية، صابون المواعين مفيد للشعر لكن مش على طول، في مواقف معينة، بتكون لما أنا كحلاق أبقى عايز الشعراية نضيفة وناشفة».
«الحلاق المجنون» يستخدم فرد النار بديل البروتين
«فرد النار» من بين أغرب ابتكارات «الحلاق المجنون» أيضا: «فرد عادي بكريم فرد، بنحط الفرد بعيد عن الفروة بتاع الشعر، وبعدين برش سبرتوا وبولاعة أولع في الكريم مش في الشعراية نفسها، وبعدها نغسل بحمام كريم أو بلسم، ودا بيبقى للناس اللي مش معاهم فلوس يعملوا بروتين».
فوار الهضم لتنظيف الوجه من الدهون
بدل الليزر وتكلفته المرتفعة، يستخدم «عبدالله» فوار هضم الطعام لتنظيف الوجه من الدهون والبثور السوداء، «بستخدم فوار راني بتاع الهضم وبغسل به البشرة، بعمل حاجة اسمها شمع الأول عشان أنضف الوش من أي شعر وأي حاجة، وبعدها ماسك كريم ترطيب وجلسه بخار، وبعدها برش الفوار على الوش، وبعدين ببخاخة مياه برش على الفوار، فبنلاقي الفوار بيدوب الكريم ويسحب الدهون، وملوش أي أضرار ولا حرقان للبشرة، ودا مفيد جدا لأن الفوار فيه فيتامين سي وبيفور الدهون».
ينصح عبدالله بتوخي الحذر أثناء تنفيذ هذه الإجراءات؛ لأنها يجب أن تكون بواسطة شخص يدرك جيدا كيفية تنفيذها: «أنا بقالي 22 سنة بشتغل حلاق، وورثت المهنة دي من أبويا أنا وإخواتي».
