دليل إثبات شخصية
دليل إثبات شخصية
ألفّ دول العالم من آسيا للاتينية
وأروح جنوب أفريقيا والدول الأوروبية
وتفضل ملامحك فى وشى يا مصر
دليل إثبات شخصية
ألفّ دول العالم وأول ما ينطق لسانى
وأبتدى أتكلم ومن بداية كلامى
يعرف على طول إنى من مصر
اللى واقف يكلمنى قدامى
ألفّ دول العالم ومن شهامتى
وأسلوبى المسالم وعزة نفسى وكرامتى
يتعرف على طول إنى من مصر
من غير ما يتشاف جوازى ولا حتى بطاقتى
ألفّ دول العالم ومن سمارى
وخفة دمى وطريقة هزارى
يتعرف على طول إن مصر
هى بلدى ودارى
ألفّ دول العالم ومن الإحساس
بغيرى وأدبى فى تعاملى مع الناس
يتقال على طول ده جاى من مصر
البلد اللى الطيبة فيها أساس
ألفّ دول العالم ماشى غريب
بين الناس ولا لىّ حد قريب
وأول ما يتعرف إن بلدى مصر
يصير لىّ فيها ألف حبيب
