حفيدة رجاء الجداوي باكية: «مش شيفاها بس بحسها معايا وبتطبطب عليا»
حفيدة رجاء الجداوي باكية: «مش شيفاها بس بحسها معايا وبتطبطب عليا»
علاقة قوية كانت تربط الفنانة رجاء الجداوي بحفيدتها «روضة»، ومع مرور الذكرى السنوية الأولى لرحيلها، كانت الحفيدة هي أول من تذكرتها.
رجاء الجداوي وحفيدتها
وفي تصريحات خاصة لـ«الوطن» تذكرت روضة جدتها الفنانة رجاء الجداوي بالدموع قائلة: «وحشتني، بس بردو على مدار السنة اللي فاتت أي حاجة وحشة كانت بتحصلي، كنت بحس إنها موجودة وبتهديني وبتطبطب عليا أوي، وأي حاجة حلوة كمان كنت بحس إنها معانا».
وتابعت روضة قائلة: «حتى يوم تخرجي كنت حاسة إنها معانا وقاعدة بتتفرج عليا، وكمان لما جيت ألبس في البيت علشان أروح حفل التخرج لبست في أوضتها واتصورت».
وأضافت روضة: «أنا باعتبر إنها موجودة.. أنا مش شيفاها بس بحس إن هيا معايا، وكانت دايما تقعد معايا وتذاكرلي حتى لو مش هتذاكرلى تقعد جنبي وأنا بذاكر».
وتابعت روضة قائلة: «أنا كمان كنت بقعد أسمعلها الدور اللي هتقدمه أو لما تكون بتقرا سيناريو جديد».
وأضافت روضة «عايزة أقولها وحشتيني أوي وحشني هزارك معايا وحشتني بساطتك وحبك لينا مفتقداكي أوي في حياتي».
أعمال رجاء الجداوي
يذكر أن الفنانة رجاء الجداوي، واحدة من أهم الفنانات في الوطن العربي، وقدمت على مدار مشوارها الفني الكثير من الأعمال الفنية التي تخطت حاجز الـ100 عمل على المستوى السينمائي، وتخطت حاجز الـ200 عمل على المستوى الدرامي.
مسلسل لعبة النسيان
وكانت آخر الأعمال الدرامية التي شاركت فيها مسلسل «لعبة النسيان»، الذي شاركت فيه بجانب دينا الشربيني، وأحمد داوود، وإنجي المقدم، وأحمد صفوت، وعدد آخر من الفنانين، وهو من تأليف تامر حبيب، وإخراج أحمد شفيق.
