محمد محمود عن سمير غانم: «كان عايش علشان يضحك الناس»
محمد محمود عن سمير غانم: «كان عايش علشان يضحك الناس»
قال الفنان محمد محمود، إن الفنان الراحل سمير غانم، كان فنانا متواضعا وخلوقا، ولديه الكثير من الأعمال الخيرية التي قدمها للكثير من الأشخاص على مدى حياته، «كان عايش علشان يضحك ويضحك الناس، ومش بيحب الأخبار السيئة، وكان إنسانا محبا للخير».
وأضاف «محمود»، خلال مداخلة له عبر الفيديو ببرنامج «مساء DMC»، الذي تقدمه الإعلامية آية جمال الدين، والمذاع على فضائية «DMC»، أنه على يقين بأنه لن يقابل شخصا في بساطة الفنان الكبير الراحل أو أخلاقه، وكذا تواضعه ، «لحد أول رمضان كان بيبعتلي حاجات تضحك على الواتس أب، راجل كان عايش علشان يضحك».
وأوضح أن أولى أعماله المسرحية معه، كانت مسرحية «بهلول في أسطنبول»، وحينها لم يكن يعرف بأنه يمثل معه في المسرحية، «مكنش بيغير من حد على التمثيل، وكان بيشجعني علشان أقول إفيهات، وبيفرح لما حد بيقول إفيه ويعلي مع الناس».
وأكد أن سمير غانم امتاز بالتلقائية الشديدة، خاصة أثناء تواجدهم على خشبه المسرح، «كنا بنضحك على ارتجاله، ومكنش حد بيزعل منه، وبيضحك عادي جدا».
وتابع: «في مرة قولت إفيه عالي في المسرحية، والناس قالتلي أنه زعل أن الإفيه بتاعي أعلى من الإفيه بتاعه، روحت اعتذرله، قالي أنا مش زعلان، الإفيه بتاعك أحسن من اللي كنت هقوله، واشتغلت مع ناس كتير محدش بيعمل اللي كان بيعمله».
وأوضح: «أول مرة يطلع عمرة كان معايا، وكان مبسوط جدا، وكان بيمتاز بطاقة إيجابية ماشية على الأرض، وكان فيه كل الخير والتواضع، وكان في التصوير بيطلع فلوس حقيقيه يدهالنا، وعادة الحاجات دي بتبقي مش حقيقية، لكن اللي كان بيطلعه حقيقي، كان جواه حب وبساطة وتسامح وطيبة متناهية الله يرحمه، ومكنش بيعمل أو يقول حاجة تزعل الناس».
