مميش: البحرية كانت في دمي وأنا صغير.. وكنت بروح السينما بإذن أبويا
مميش: البحرية كانت في دمي وأنا صغير.. وكنت بروح السينما بإذن أبويا
قال الفريق مهاب مميش، مستشار رئيس الجمهورية لمشروعات محور قناة السويس والموانئ البحرية، إن أقصى خطأ قد يرتكبه في وجه نظر والده هو دخوله السينما دون أذنه، «مينفعش أخرج من نفسي كده وأروح السينما مع أصحابي لازم آخد إذنه أولا، إحنا كمان كنا نعتبر الجيران إخواتنا، جيراني كانوا عمي نجيب مسيحي، لو أبويا مسمعنيش وأنا بنديله بعمي كان يبقى فيها مشكلة، لازم أقوله يا عمي».
وأضاف «مميش»، خلال حواره في برنامج «المواجهة»، مع الإعلامية ريهام السهلي، على شاشة «إكسترا نيوز»: «كنا يوم نسهر عندنا ويوم نسهر عندهم، عنده ولاده ماهر وسمير وسعيد دول أخواتنا، لما أمي تيجي تنزل تكلم طنط منيرة تيجي تقعد معانا، لا كنا نعرف فتنة طائفية ولا فيه مسلم ولا فيه مسيحي، كلنا أسرة واحدة، عظمتنا في كده، الدين لله والوطن للجميع».
وواصل: «أنا فتحت عيني على البحر، كنت يوميا أدخل في البحر كان لينا كابينة هناك أروح وأنزل المياه، البحرية كانت في دمي من وأنا صغير، كانت ظروف القوات المسلحة لها رونق والكل كان يتسابق على الالتحاق بها».
وعن عقاب والده له، قال «مرة كنت جاي من السينما ودخلت البيت والدي كان عنده ضيف، ووالدتي كانت عشاء ليهم، سلمت عليهم وروحت أتعشى معاهم، كانوا بيلعبوا طاولة نسيت وحطيت رجل على رجل، منمتش من بليل للصبح، قالي أنت متعلمتش حاجة، واداني درس تمام، هو مات على إيدي، وأمي كانت مؤثرة جدا، محدش يقدر ينساهم، هما ربونا».
