صاحب محل ملابس يخنق زوجته بسلك كهربائي: «بتقولي محسوب عليا راجل وخلاص»
صاحب محل ملابس يخنق زوجته بسلك كهربائي: «بتقولي محسوب عليا راجل وخلاص»
«اتجوزت مراتي من حوالي 15 عامًا، كان ساعتها عندها 17 سنة، وكنا عايشين عيشة عادية وخلفنا 3 بنات، الأولى عندها 10 سنين والتانية 5 سنين، والثالثة 3 سنوات، وحصل بينا خلافات في آخر 4 شهور بسبب إني بعت الشقة بتاعتنا وهيا مكنتش موافقة»، بهذه الكلمات بدأ حمدي عبداللاه، 47 عامًا، صاحب محل ملابس، والمتهم بقتل زوجته «مروة»، 34 سنة، ربة منزل، سرد تفاصيل الواقعة، التي حدثت في غضون دقيقتين تقريبًا.
اعترفات المتهم بقتل زوجته
تعود تفاصيل القضية التي تحمل رقم 2741 لسنة 2020 جنايات منشأة ناصر، إلى شهر أكتوبر عام 2019، عندما اعترف المتهم أمام النيابة العامة بتفاصيل قتل زوجته بسبب بيعه شقه الزوجية التي كان يمتلكها في منطقة منشأة ناصر، والمكوث في شقة إيجار جديد، ومنذ ذلك اليوم بدأت المشاكل تدب بينهما.
خنق زوجته بسلك كهرباء
عاد المتهم بالذاكرة إلى الوراء وتذكر ما حدث من شريكة عمره منذ وقت بيعه للشقة «من اليوم اللي بعت الشقة والمشاكل بدأت، وكانت بتشتمني كتير لحد اليوم اللي حصلت فيه الجريمة، فضلت تقولي يا مجنون، إنت محسوب عليا راجل وخلاص، وهيا عارفة غن الكلمة دي بتغيظني، وفاض بيا الكيل، واتخانقت معاها، وكنا ساعتها في المطبخ، وهيا كانت ماسكة مقص عاوزة تضربني بيه، لكن حاولت أدافع عن نفسي، قمت جايب سلك كهرباء كان على الأرض لفيته حوالين رقبتها وشديته لغاية ما وقعت الأرض والمقص وقع من أيديها، أخدت سكين كان موجود فوق البوتجاز وفضلت أطعن في جسمها لغاية ما جابت دم».
قتل زوجته واتصل بالإسعاف
وتابع، «لما شوفت منظر الدم خوفت إن حد من الولاد يصحي، سيبتها سايحة في دمها وقفلت باب المطبخ بالتلاجة وخرجت روحت منطقة الإسعاف، على أساس إن لو فيها الروح حد يلحقها، لكن ساعتها محدش رضي يجي معايا، رجعت الشقة تاني وأخدت تليفون حد من جيراني واتصلت بالإسعاف لما جم بصوا عليها لقوها ماتت، وطلبوا مني أني أقعد وطلبوا الشرطة».
وأثبت تقرير الطب الشرعي، أن المجني عليها توفيت نتيجة إصابتها بطعنتين يسار الصدر، ويسار العنق بآلة حادة سكين، والخنق، كما أن البصمة الوراثية للخلايا البشرية المعثور عليها بأظافر المجني عليها تتطابق مع البصمة الوراثية الخاصة بالمتهم.
تم تحرير محضر بالواقعة، وتولت النيابة العامة التحقيقات والتي أحالت بدورها القضية إلى محكمة جنايات شمال القاهرة المنعقدة في العباسية، والتي أصدرت حكمها ضد المتهم بالسجن المؤبد.
صدر الحكم برئاسة المستشار وفيق محمد مكاوي وعضوية المستشارين محمد أحمد سالمان وسامح عبدالرحمن سالم وأمانة سر رفاعي فهمي.
