«سيدة التروسيكل» في ظهورها الأول بعد استجابة الرئيس لها: بشكر «الوطن»
«سيدة التروسيكل» في ظهورها الأول بعد استجابة الرئيس لها: بشكر «الوطن»
ظهرت السيدة ناهد جمال سعيد، المعروفة بـ«سيدة التروسيكل»، في فيديو خاص لـ«الوطن» بعد استجابة الرئيس عبدالفتاح السيسي لحالتها بعد أن ظهرت ببرنامج «من مصر»، المذاع على شاشة «CBC»، بعد أن نشرت الزميلة الصحفية سمر صالح، قصة كفاحها، في سبتمبر الماضي، بعنوان «ناهد حمالة قسية.. ضهرها يشيل رمل وطوب وعفش وأب وأم لـ5 بنات».
وقالت «سيدة التروسيكل» في ظهورها الأول بعد استجابة الرئيس لحالتها: «أنا فرحانة جدا وأول مرة في حياتي أحس بالفرحة دي والبركة أستاذة سمر طبعا، أنا مكنتش متوقعة أي حاجة احنا كنا قاعدين بنصور ومكنتش أتوقع أن الرئيس عبدالفتاح السيسي يدخل معايا أنا مداخلة وأنا أقل الناس، أنا كنت هقع من الفرحة ومنمتش لحد الصبح من الفرحة، وبشكر جريدة الوطن اللي تواصلت معايا للنهاردة البركة فيهم وأستاذة سمر تعبت معايا كتير وأنا عارفة إني تعبتها معايا».
وأضافت «سيدة التروسيكل»: «نفسي استجابة الرئيس عبدالفتاح السيسي ليا تتحقق، وفضل من ربنا إنه وصلني للرئيس عبدالفتاح السيسي، ومش عارفة أتكلم من فرحتي ولا أعبر، بس الرئيس هيستر بناتي الخمسة ربنا يسترها عليه، نفسي رخصة الكشك تطلع وأبقى جنبهم في الدراسة وأراعيهم ويبقوا قدام عليا، ونفسي يبقى لينا بيت والناس متفضلش تطالبنا بالإيجار».
وتابعت «سيدة التروسيكل»: «بعد مكالمة الرئيس لقيت الشارع كله خرج وبيباركلي وبيقولولي مبروك يا أم دينا.. الحمد لله يا أم دينا ربنا كرمك بعد تعبك وشقائك.. وعاوزة أقول للرئيس ربنا يخليك للغلابة اللي زينا وتفضل معانا وتراعينا كمان وكمان».
