نرمين الفقي: اترعبت من دوري في «ضل راجل».. واكتئبت بعد «الليل وآخره»

01:32 ص | الجمعة 19 مارس 2021

كشفت الفنانة نرمين الفقي عن أعمالها الدرامية المقبلة، حيث قالت: «أشارك في رمضان بمسلسل (ضل راجل) وبجد أنا تعبت أوى فيه بسبب كم الشجن والوجع والألم والطبيعية والتلقائية اللى مكتوب بيها السيناريو، وأنا كلمت المؤلف أحمد عبدالفتاح وقلتله بجد أنا تعبت وبقيت مرعوبة وحاسة إنى مش عارفة أعمل حاجة، بس هايكون دور مختلف تماما بجد والناس هتتفاجئ».

وأضافت «الفقي»، خلال لقاء ببرنامج «معكم منى الشاذلي»، المذاع على شاشة قناة «CBC»، وتقدمه الإعلامية منى الشاذلي، «كمان بشارك في مسلسل (النمر) ودى حاجة عمرى ما عملتها في حياتى، وبعمل دور شمس تاجرة من كبار تجار الصاغة وده امتحان صعب جدا ليا، وفى أول الاتفاق قعدنا أنا ومحمد إمام والمخرجة شيرين عادل والمؤلف محمد صلاح العزب، وكانوا متخوفين عشان أسلوب الكلام بتاع تجار الصاغة، لدرجة إنى لما عملت أول مشهد لقيت محمد إمام بيقولى إنتى حدوتة، وشيرين عادل كانت خايفة في الأول بس اطمنت بعد أول مشهد».

وأكدت «الفقي»، أن مسلسل «الليل وآخره» هو عمل فني سيظل مدى الحياة، «كان ليا الشرف إني اشتغل هذا العمل، لأن ده مش هيتنسي، مهما هعمل وهيجيلي أعمال، مدام رباب حسين بسميها أمي وأنا ماشية من المسلسل ده، قعدت حضناها وبعيط، بقولها هو أنا مش هشوفكم تاني؟ مكنتش مصدقة إن خلاص فركش، ودخلت في اكتئاب وحزن أن المسلسل خلص وكواليس العمل والقلب الحلو النضيف بيبان في الآخر في الشاشة»، لافتة أن من أحب أعمالها أيضا «البحار مندي»، و«الأصدقاء».