نرمين الفقي: أول مرة أشوف فيها والدي كان عندي 16 سنة
نرمين الفقي: أول مرة أشوف فيها والدي كان عندي 16 سنة
قالت الفنانة نرمين الفقي، إنها عاشت مع جدها وجدتها وعائلتها في فيلا بمنطقة «لوران» بالإسكندرية، وبعدما كبرت أدركت أن والدها ووالدتها مطلقان، «أول حياتي كانت صعبة جدا، وسن 16 عاما كانت فيصل في حياتي، 16 سنة مشفتش بابي، كان مهاجر برا ومكنش بيجي مصر إطلاقا، لكن كان عندي توازن إلى حد كبير، عشان كدة دايما بقول أنا من غير عيلتي أنا معرفش كنت عاملة إزاي».
وأضافت «الفقي»، خلال لقاء ببرنامج «معكم منى الشاذلي»، المذاع على شاشة قناة «CBC»، وتقدمه الإعلامية منى الشاذلي، «كان عندي بدل الأب 4، وزوج خالتي كان الخامس، وعمري ما حسسوني محتاجة حاجة، وبقدر المستطاع كانوا بيحاولوا يعوضوني دة بس طبعا مفيش حاجة تعوض الأب خاصة لو عايش في الحياة».
وتابعت: «سن 16 كان فيصل بالنسبالي لأن دة كان بداية تعب أمي ومرضها، كان عندها ورم في المخ وكانت لازم تسافر وتعمل عملية، فكنت لازم أروح وأقعد عند بيت عمتي، ودة سبب لي تخوف، لأن هشوف عيلة والدي أول مرة، إحساس صعب، ولما قعدت مع عمتي بكذا يوم محستش في ثانية بعيد عني، كانت تجنن، وأونكل محمد كان دكتور في كلية الهندسة، وكان بيقعد بيذاكرلي، وكمية الحب والعطاء اللي إدهولي».
وواصلت: «أول مرة أشوف فيها والدي وأنا عندي 16 سنة، أمي كانت بتعمل عملية وهو جه من بلجيكا، ودي حاجة يمكن مقولتهاش قبل كدة خالص، مشاعري لما شوفته في الأول غريبة، والزعل كان لا جدال فيه، ودة جوايا، بس ربنا يديله الصحة وطولة العمر، وآخر كام سنة بقى بينا حب والعطاء والقدر المستطاع بس أنا من جوايا مكنتش أتمنى وأشوفه وأنا عندي 16 سنة، وبقول لكل عيلة خلي بالكم من الحتة دي، أنا قدرت أوازن لكن غيري ممكن ميعرفش».
