أبرز تصريحات محمد منير: لما وصلت محطة رمسيس قولت أنا هبقى شيء مهم

03:51 ص | الثلاثاء 16 مارس 2021

حل الفنان محمد منير ضيفا على الفنانة إسعاد يونس، في برنامج «صاحبة السعادة»، المذاع عبر فضائية «dmc»؛ إذ تحدث «الكينج» عن قصة كفاحه الطويلة، ونجاحه ومسيرته الفنية وأصدقائه، في لقاء ظهر خلاله وفي رأسه بعض الشعر الأبيض، وهذه التصريحات نرصدها لكم كما يلي:

1- «42 سنة من الكفاح عشان الأجيال الجديدة ماتستعجلش المشوار، ووقفت ووقعت وقمت تاني، وكل الأيام بتبقى مضطربة ما بين النجاح العظيم والفشل، ولو مدقتش الفشل مكنتش حسيت بطعم النجاح، ولو مدقتش النجاح مكنتش عرفت الاستمرارية وشفت المستقبل».

جمهوري كانوا 500 وأنا ابن لكل الشعب المصري

2- «كان عندي جمهور 500 واحد نصهم من بيتي وأصحابي المنتجين وأسرهم والفنانين، وكنا قليلين، والنهاردة أنا بغني وابن لكل الشعب المصري وده مشوار عشان الأجيال الجديدة عشان تنتبه، والمشوار كان معاناة».

3- «كل فنانين مصر زاروني في الفترة الأخيرة بس روح إخواتي موجودة ومقدرش أعمل أي موبقات مقدرش أغضب ربنا مقدرش أعمل أي حاجة».

4- «بقول للشعب المصري كله أنا بصحة جيدة والحمد لله أنا بخير وكلي شفاء وسعادة وبتمنى لكل المرضى الشفاء العاجل، وربنا يشيل الأزمة العالمية لكورونا».

لما وصلت محطة رمسيس قولت أنا هبقى شيء مهم في البلد

5- «لما وصلت محطة رمسيس قولت أنا هبقي شيء مهم في البلد ومطرب كبير وذو شأن كبير في التمثيل والغناء، وزي ما عاهدت أبويا».

6- «أنا أحسن وقوي وقوي بيكم وبالناس اللي بيحبوني، وأنا عايش بنفسكم وبتنفسكم وبألتراس محمد منير وبكل محبي محمد منير، وأكيد اتعلموا من محمد منير درس مهم هو حب الوطن».

7- «رسالة بقولها للأجيال الجديدة حبوا وطنكم ووطنك لو حبيته هيديلك وقيادته هتديلك وشعبك المصري».

8- «مصر بالنسبة لمحمد منير المطرب هي سيد درويش ومحمد عبدالوهاب والسنباطي وكمال الطويل وبليغ حمدي، ومحمد قنديل ومحمد عبدالمطلب وشفيق جلال وأحمد غانم وأحمد عدوية، وفي الآخر عمرو دياب ومحمد منير».

9- «كان عندي أبونيه أتوبيس 1 اللي بيروح من أم المصريين للجيزة وكنت بطلعه بـ50 قرشا عشان أنا طالب وكان زملاتي بيحبوني، قوي ولما وصلت بكالوريوس فنون تطبيقية قعدت 3 سنين في البكالوريوس عشان أجل الجيش».

10- «بنربي ولادنا كويس وبنعلمهم يشاركوا في الانتخابات وأنا علمتهم الموضوع ده عشان وطنهم أولا، وعشان عمك أو خالد محمد منير».

كل يوم بزداد شهرة ونجاح

11- «كل يوم بزداد شهرة وبزداد نجاح ومقدرش أنسى إني خلصت جيش سنة 80 وكل اللي بيغنوا معايا كانوا مصريين 100% وعمرهم من 18 لـ30 سنة ولما غنيت كانوا هما سندي ومشوار طويل وبيفكرني بوجع المشوار اللي بقع فيه وبقوم».