وزير العدل عن تعديلات الشهر العقاري: تقضي على ثغرات التسجيل الرضائي
وزير العدل عن تعديلات الشهر العقاري: تقضي على ثغرات التسجيل الرضائي
شرح المستشار عمر مروان، وزير العدل، تفاصيل القانون المقدم «الشهر العيني» لحل أزمة التسجيل في الشهر العقاري، حيث ذكر أن هذا القانون يّحل مشكلة سلسلة الحلقات العرفية، «القانون زي اللي بيقول إحنا ولاد النهاردة، من هو الحائز للعين النهاردة ومنتفع بها، يبقى ده ملكك، ونبدأ من النهاردة، ونسجل الوحدة ونقول مفيش حلقات بيع عرفية تتم بعد كده، عشان مايكنش فيه ثغرة مرة أخرى، ده بالنسبة للتسجيل الرضائي».
وأضاف «مروان»، خلال مداخلة هاتفية في برنامج «الحكاية»، مع الإعلامي عمرو أديب، على شاشة «mbc مصر»، أن التسجيل القضائي يتم رفع قضية أمام المحكمة، «فيه إجراءات طويلة تتم، بمتوسط مدة عشان تأخذ حكم فيها سنة، بعد الحكم بتروح الشهر العقاري عشان تعمل إجراءاتك، يقوموا يعيدوا نفس الإجراءات اللي تمت في المحكمة، ويبقى دخلنا كده في متوسط مدة كمان سنة».
وأشار وزير العدل، إلى أن الوزارة ارتأت بأن القاضي طالما أصدر حكم ورأى الملكية وأركان العقد وشروطة وصحته، فلا داعي للتكرار، حتى لا تصبح هذه الإجراءات مضيعة للوقت، «الناس بتزهق، قولنا نعمل مشروع القانون 35 مكرر إذا حد معاه حكم نهائي يروح الشهر العقاري على طول يديله رقم تسجيل مؤقت ونعمل شوية ضوابط لمدة شهر، هننشر الحكم ولو حد عنده اعتراض لمدة شهر يقدمه».
وتابع: «لو حد قدم اعتراض، الشهر العقاري على طول يشوف الورق، ممكن يرفض الاعتراض ويخلي القيد يأخذ من مؤقت لدائم، لو الاعتراض له واجهته يلغي الرقم المؤقت ويقولوا روحوا للمحكمة هي اللي تفصل واتصرفوا مع بعض، الاجراء اللي عملناه ده وفر للمواطن 50% من الاجراءات ومن وقته ومن المصاريف اللي كان بيدفعها لما يدفعها لاستخراج، نختصر فيها الاجراءات اللي بتاعة التسجيل، هل الشق ده فيه اي مشكلة، ده كويس».
