أستاذ مناعة يُحذر من «النودلز» بعد كورونا: شوفوا اللي حصل في أوروبا

09:32 م | السبت 06 فبراير 2021

حذر الدكتور مجدي بدران، عضو الجمعية المصرية للحساسية والمناعة، من تناول الشعرية سريعة التحضير «نودلز»، قائلا: «اتعلمنا من كورونا اللي أصابت فوق الـ106 مليون في العالم، العودة للمائدة الطبيعية، الصين غيرت أكلها، وإحنا لازم نغير أكلنا ونرجع تاني للمائدة المصرية اللي بتتعمل في البيت.. كلوا أكل محضر في بيوتكم، الأكل اللي بيتحضر برا البيت خطر جدا».

مدة صلاحية النودلز منتهية

وأضاف «بدران»، خلال اتصال هاتفي ببرنامج «حضرة المواطن»، المذاع على شاشة قناة «الحدث اليوم»، ويقدمه الإعلامي سيد علي، «أنا معرفش المياه المستخدمة شكلها إيه، بيبقى واحد واقف قدام المدرسة وجايب عربية قديمة ملاكي، معرفش جايبها منين، وقدامه تُرمُس مياه، وعمال يحط للأولاد، ومعرفش المياه إيه مصدرها، ولا مصدر الوعاء، ودة أخطر من الطعام من الباعة الجائلين، كما أن مدة الصلاحية للإندومي منتهية».

اللي جعان ياكل من بيته

وتابع: «اللي جعان ياخد أكل من بيته وهو خارج الصبح، كفاية اللي حصل في أمريكا وإيطاليا وأوروبا من الوجبات بتاعتهم، مناعتهم قلت وأمراضهم كترت، وفيروسات كتيرة طلعت علينا في العالم كله، زي نيباه وغيره، وذلك نتيجة للتغير في نمط الحياة الخاطئ».

الأكل الصحي يرفع المناعة

ووجه رسالة للأطفال، قائلا: «كلوا زي ما كنا بناكل زمان، كنا بناكل أكل صحي، وناخد سندوتشات من بيوتنا، هو دة المضمون لرفع الصحة والمناعة».

وكان المعهد القومي للتغذية، قال إن الإندومي من الأطعمة الجاهزة عالية المحتوى من النشويات والتي يتناولها الأطفال والشباب وتؤدي إلى زيادة الوزن والسمنة وما يترتب عليها من أمراض مزمنة مثل السكر والضغط والقلب، كما أن تناول الأطفال للإندومي كوجبة يقلل من تناولهم للأغذية المفيدة، التي يحتاجونها مثل الخضار، الفاكهة ومنتجات الألبان.

وتابع المعهد، في بيان أصدره، أن ما ورد عن أن الإندومي يسبب ضمور الأعصاب بسبب مادة الصوديوم إحادي الجلوتامات، المستخدمة لإضافة النكهة في العديد من الأطعمة المصنعة، لا يوجد دراسات أثبتت أنها تسبب ضمور الأعصاب في الأطفال، وهناك ما يسمى بالاستخدام الآمن لها.