الرسم بالتنقيط: «محمود» جاب لـ آسر ياسين أكثر من 64 ألف نقطة
الرسم بالتنقيط: «محمود» جاب لـ آسر ياسين أكثر من 64 ألف نقطة
حبه للإختلاف دفعه إلي الرسم بطريقة مبتكرة مستخدمًا أدوات مختلفة، هكذا أراد محمود محمد صديق، الطالب في الفرقة الثالثة بكلية الفنون الجميلة جامعة الإسكندرية، قسم جرافيك شعبة رسوم، حينما قرر أن يترك بصمة في مجال الفن عن طريق الرسم بالتنقيط.
واختار «محمود»، المقيم في مدينة العجمي بالإسكندرية، الرسم بالتنقيط لإختلافه عن الرسم بالرصاص قائلًا: «الرسم بالرصاص ناس كتير بتعمله ومستوياتهم مختلفة وطبعًا بيطلعوا شغل حلو بس علشان بحب أعمل حاجات مختلفة اخترت الرسم بالتنقيط لأنه بيوديني مكان تاني خالص مختلف وممتع».
الرسم بالتنقيط.. وقت طويل
يحتاج الرسم بالتنقيط إلى وقت طويل، يتفرغ له «محمود» في أوقات الاجازات موضحًا: «وقت الكلية بيبقى عندي مشاريع كتير عشان كده بشتغل أوقات الاجازات وبرسم فيها زي أجازة الصيف اللي فاتت اللي عملت فيها رسمتين بالتنقيط واحدة للفنان حسن حسني رحمه الله والتانية للفنان عمرو عبد الجليل واستغليت الأجازة دلوقتي ورسمت الفنان آسر ياسين».
اقرأ أيضًا.. طالب هندسة يُبدع في فن الرسم ثلاثي الأبعاد: هوايتي مأثرتش على دراستي
ولاقت رسوماته اعجاب الناس بعد أن شاركها مع رواد مواقع التواصل الاجتماعي من خلال نشرها على جروبات كثيرة بـ«فيسبوك»: «الناس شجعتني عشان أبعت رسمة الفنان عمرو عبد الجليل له شخصيًا وفعلا بعتها له على صفحته الشخصية على الفيس بوك ورد عليا وعجبته جدًا الحمد لله وشكرني عليها».
كيفية الرسم بالتنقيط
ويستخدم «محمود» في رسوماته قلم تحبير أسود ويوضح: «كل ما النقط تقرب من بعض تبان الرسمة أكتر في شكل أشبه بالنيجاتيف ولكن هو مش نيجاتيف هو بيعتمد على مدى قرب أو بعد النقط عن بعض وكل ما قربت النقط أكتر وكل ما مساحة الورقة البيضاء بتختفي ساعتها بتبان الرسمة بشكل أوضح».
وإستغرقت لوحة الفنان عمرو عبد الجليل أسبوع بشكل غير متواصل وتقدر عدد النقاط المستخدمة في الرسمة بشكل تقريبي بحوالي 75 ألف و834 نقطة، أما رسمة الفنان آسر ياسين بلغت تقريبا 64 ألف و922 نقطة، بحسب «محمود».
