"فارس" يعتق "حصان جريح" من تعذيب صاحبه: اشتريته بـ500 جنيه
"فارس" يعتق "حصان جريح" من تعذيب صاحبه: اشتريته بـ500 جنيه
صور لحصان هزيل مصاب بجروح متفرقة في جسده أثارت حزن رواد التواصل الاجتماعي، الذين تداولوا قصته على نطاق واسع، فبعد إصابته بعجز في القدم أدى إلى التوائها، اعتدى عليه مالك الحصان بقسوة حتى يسير رغما عن إصابته وإمعانا في تعذيبه كان يضربه في مواضع جروحه.
انتشرت تلك الصور على نطاق واسع بين المهتمين بشؤون الحيوانات، الأمر الذي دفع محمود فارس من منطقة شبرا، ناشط في حقوق الحيوانات، للذهاب إلى صاحب الحصان في محاولة منه لمعرفة تفاصيل أكثر عن الحالة الصحية له من أجل المساهمة في علاجه: "الموضوع بدأ بشوية صور، حد صورها لعربجي في شبرا شغال في الزبالة، بيضرب الحصان بتاعه ضرب مبرح ولم يرحم عجزه أو سنه، طبعا الصور دي انتشرت بشكل واسع، ولما عرفت الموضوع نزلت أشوف الوضع على الطبيعة".
ذهب "فارس" إلى شبرا الخيمة في محاولة لإنقاذ الحصان، ولكن مقابلة صاحب الحصان له لم تكن على ما يرام، لأنه برر وجود تلك الإصابات بأنه اشترى الحصان وهو مصاب، وأن الإعاقة الموجودة لديه ليس له دخل بها: "معرفتش أخد منه حق، قررت أروح حي شبرا، وهناك أعرف موظف صاحبي، جه معايا للولد ده، ولما روحنا هناك وعرف إنه من الحي، بدأ يتكلم كويس معانا، طلبنا منه نشتري الحصان رفض في البداية وقال ده غالي عليا، وبعدين قال هبيعه بـ1200 فوصلت معاه لـ500 جنيه ووافق".
لم يكتف "فارس" بما قاله الشاب حول الإصابات الموجودة في الحصان، وقرر أن يعرف حقيقة الأمر من الجيران: "روحت للجيران وعرفت منهم إن الشاب ده هو اللي بيضرب الحصان، وأنه علشان يحركه بيعوره في جسمه علشان يضغط على الجرح فالحصان يمشي من الوجع، وأنه مشغله ليل ونهار من غير أكل، وطبعا وضع الحصان في الواقع صعب جدا، ضلوعه باينه وضهره كله مليان جروح وهو بيحط له سائل أزرق مكان الإصابات دي".
انتهى الأمر بـ"فارس" إلى شراء الحصان، ولكن تقف عقبة أمامه وهو عدم وجود مكان لديه: "هدفع الفلوس وحد يتبنى الحصان حرام ده روح، وملوش ذنب أنه وقع في ايد شاب معندوش رحمة".
يتمنى "فارس" أن يتم تفعيل قانون يهتم بالحيوانات، يحتوي على عقوبات قاسية لمن يعذبون الحيوانات: "قبل كده شوفت عربجي رمي الحصان بتاعه في الزبالة وهو حي لما رجله اتكسرت، محتاجين قانون يطبق بحزم في حالات تعذيب الحيوانات".
