من تدوير القمامة لـ النحت.. "محمود" صانع تماثيل فرعونية بـ150 ألف جنيه
من تدوير القمامة لـ النحت.. "محمود" صانع تماثيل فرعونية بـ150 ألف جنيه
يملك موهبة فنية فذة، بالإضافة إلى الذوق العالي والمهارة، فهو عاشق للفنون اليدوية والتشكيلية، حيث يقوم بإعادة تدوير القمامة وإنتاج ألعاب للأطفال، وتمكن محمد أحمد، التطوير من موهبته المميزة والمختلفة، وتحقيق حلمه حتى أصبح نحاتًا شهيرًا صانعًا للتماثيل الفرعونية، باستخدام أحجار الجرانيت.
داخل ورشة متواضعة بمساحة محدودة، بمنطقة الخصوص التابعة لحي المرج، يتخذها "محمد" مقرًا يمارس فيه هوايته، فتبدو وكأنها متحف فرعوني، إذ تحتوي على أعداد كبيرة من التماثيل المنحوتة لأشهر التماثيل الفرعوينة، ومنها "نيفرتيتي، توت عنخ آمون، تحتمس، أنوفاس"، ولها أحجام مختلفة تصل إلى 12 مترًا: "النحت موهبتي من زمان ومبدأتش فيه أول حاجة لكن كنت بلم القمامة وبعملها إعادة تدوير وأعمل منها لعب أطفال، وده كان وأنا عندي 13 سنة، بعدها بدأ الشغف بالنحت يكبر جوايا، خصوصًا أن والدي فنان تشكيلي، اتعملت منه وكنت بشوفه بيرسم قدامي وكل ده ساعد الموهبة اللي عندي تكبر وتخرج"، بحسب "محمد".
بدأ "محمد" في نحت المكاتب والكراسي والطُبل الصغيرة، ومن ثم قام بنحت التماثيل الفرعونية: "التاريخ والآثار بالنسبة لي مش مجرد أشكال ونقوش أنا بحب التاريخ وبقرا فيه دايمًا وعشان كدة شغفي بالتماثيل الفرعونية كبير.
ويستخدم "محمد" أحجار الجرانيت الأسود، والوردي، والأبيض، ويتراوح سعر التمثال الفرعوني بين ألف جنيه إلى 150 ألف جنيه، وفقًا لحجم التمثال ونوع الجرانيت المستخدم: "الأدوات اللي بستخدمها الشاكوش والأزمير عشان تسهل عليا النحت"، ويستغرق "محمد" فترة تمتد إلى 15 يومًا لعمل هذه التماثيل وبيعها: "أسعارها غالية.. وأنا مش ببالغ لأن كل دي أحجار غالية جدًا والتماثيل كأنها تماثيل فرعونية حقيقية وكل حاجة ولها زبونها إللي له في الحاجات دي وبتستهويه، وسوقها شغال معايا على الرغم أن المنطقة شعبية بس بعرضها كمان على "فيسبوك"، وسعيد أني بدأت من الصفر وطوّرت من نفسي".
