"علاء" كهربائي سيارات ديليفري: بروح للزبون في السريع
"علاء" كهربائي سيارات ديليفري: بروح للزبون في السريع
خدمة مميزة ومختلفة يقدمها علاء محمد، 59 عاماً، كهربائي سيارات، بمدينة العبور، فهو يعمل ميكانيكي "ديليفري" على الطرق السريعة لإنقاذ السيارات المعطلة، من خلال تحميل عدّة الميكانيكا داخل سياراته الفيات موديل 27، وإصلاح السيارات.
"معنديش ورشة ميكانيكا وعربيتي هي الورشة بتاعتي اللي بتنقل بها"، بهذه الطريقة يعمل "علاء"، في خدمة الميكانيكا "ديليفري"، بأجرة رمزية غير مكلفة: "يادوب باخد مصاريف أيدي وحق البنزين بتاعي وخلاص".
وهذه الخدمة يقدمها "علاء"، منذ أكثر من 6 سنوات، خصوصاً بعد ملاحظته وجود سيارات كثيرة معطلة على الطرق السريعة وغيرها: "بشوف أصحاب السيارات واقفة محتارة مش عارفة تعمل إيه خصوصاً الطرق اللي ملهاش خدمات خالص وده بيخليني أخد عربيتي وأجري أصلحها عشان أصحابها يركبوها ويمشوا".
وبحسب "علاء"، فهو يتقاضى أجرا بسيطا: "مش عايز أتقل على الزباين كفاية أن الأدوات بتاعت العربيات غالية".
يستغرق "علاء" من 30 إلى 60 دقيقة، في تصليح السيارات: "بنجز في التصليح بسرعة جداً عشان أقدر أخلصها وأصحابها يمشوا بها"، وبحسب "علاء"، هو لا ينوي افتتاح ورشة لصيانة السيارات، فهدفه الأساسي مساعدة أصحاب السيارات المعطلة على الطرقات السريعة: "بروح للطرق القريبة من العبور عشان قريبة مني والعربية تستحمل، أما المشاوير البعيدة فأصحاب السيارات هما بيجوا ياخدوني من البيت عشان العربية بتاعتي متستحملش المشاوير البعيدة وأصحاب العربيات بتراضيني بأجرتي"، ويعتبر "علاء"، الميكانيكي الوحيد داخل المدينة الذي يقدم هذه الخدمة ديليفيري، ويجد إقبالاً كبيراً من أصحاب السيارات: "كل الناس في المدينة وخارج العبور معاهم رقمي وبيكلموني في أي حاجة لو حصل معاهم عطل بروح لهم بسرعة جداً وبساعدهم وحتى تعاملي مع الزباين بيبقى كويس معاهم بيدفعوا مش معاهم بيدفعوا على دفعات لحد ما يسدوا حق التصليح".
