"سليمه" أصغر رسام 3D في العالم: نفسي أدخل موسوعة جينيس
"سليمه" أصغر رسام 3D في العالم: نفسي أدخل موسوعة جينيس
أبدع في الرسم منذ نعومة أظافره، أعطاه الوقت الكافي وطور موهبته التي اكتشفها في صغره، تمكن من أدواته حتى حصل على المركز الأول في الرسم وهو في المرحلة الثانوية.
سعيد سليمه 20 عاما، أحد أبناء محافظة كفرالشيخ، أحب الرسم منذ أن كان صغيرا، وتمكن من رسم الأشكال الموجودة على الكتب المدرسية الخاصة به، وكذلك الكشاكيل الورقية: "فضلت على كده لحد ما دخلت ابتدائي، وبدأت أستاذة الرسم تلاحظ إن عندي موهبة فعلا مش مجرد تقليد بس، و نصحتني إني أنميها، و أهلي برضه لاحظوا و بدأوا يدعموني ويساعدوني ويجيبولي صور أرسمها".
ظل الصغير حينها، يسعى جاهدا لتطوير موهبته حتى جاءت اللحظة الأهم والتي اعتبرها محورا في تشكيل موهبته: "كانت مسابقة الرسم على مستوى الإدارة التعليمية بدسوق، وكنت وقتها في ستة ابتدائي، ووقتها فيه أطفال كتير في المدرسة قالوا مش هتكسب وحاولوا يحبطوني، بس أنا عشان كنت بحب الرسم جدا ومؤمن بموهبتي ركزت وعملت رسمة كويسة، والحمدلله أخدت مركز أول، ومن وقتها وأنا كل سنة ببقى الأول على الإدارة التعليمية، وبدأت في المرحلة الإعدادية أطور من نفسي أكتر، واتكرمت كتير، وفي المرحلة الثانوية اتصعدت وأخدت أول محافظة، ومنها أول جمهورية".
وهنا بدأ يهتم" سليمة" برسم 3D، الذي تمكن من قلبه إلي أن حصل على لقب أصغر رسام 3D على مستوى العالم، فى المسابقة الخيرية التي تم تنظيمها في الولايات المتحدة الأمريكية، وكان ممثلاً لوزارة الشباب والرياضة المصرية، بحسب قوله: "ناس كتير لما بتشوف الرسم مش بتصدق إن أنا اللي عامله، لأنه بيكون طبق الأصل، محدش يقدر يفرقه عن الواقع، ومن حبي للرسم، لما دخلت الكلية، رسمت دكتور عندي، علشان أفرحه".
وأضاف كان هناك مشكلة في قسم المساحة والخرائط بالكلية، ومن هنا جاءت فكرة رسم البورترية لإدخال السرور على قلب الدكتور: "جبت صورة له من فيس بوك، عشان مكنتش عايز أطلب منه صورة لأنه كان هيعرف إني عايز أرسمه لأنه عارف إني برسم كويس، وكان رد فعله إنه اتبسط جدا، وقدرت أرسم الابتسامه على وشه، ونسيته الضغط اللي كان عليه شويه".
وعلى الرغم من أنه يدرس هندسة مساحة وخرائط بقسم المساحة بكلية الآداب، إلا أنه يعتبر أن الرسم هو وسيلته الوحيدة لتحقيق مبتغاه.
يحلم الشاب العشريني أن يكون رساما مشهورا، وله طريقة خاصة في الرسم: "هعمل عنها كتاب ويكون ليا معرض خاص يجيلوا الناس من كل حتة عشان يشوفوا فني، وأدخل موسوعة جينيس، فى عمل أكبر تصميم 3D على مستوى العالم، وأكون قدوة لناس كتير".
